მერიის ა(ა)იპის, „სატრანსპორტო ინფრასტრუქტურის მართვის სააგენტოს“ პროფკავშირებმა დღეს 14 დეკემბერს ჟურნალისტებთან საუბარში განაცხადეს რომ სატრანსპორტო ინფრასტრუქტურის სააგენტოში რეორგანიზაციაა დაგეგმილი, რის შედეგადაც სააგენტოში დასაქმებულ 12 მუშას უმუშევრად დარჩენა ემუქრება. პროფკავშირები წარმომადგენელთა განცხადებით, ისინი აპირებენ მათი წევრების უფლებებისთვის ბრძოლას და მერიას მოუწოდებენ რომ ეს ადამიანები სამუშაოს გარეშე არ დატოვონ.
„რეორგანიზაციის შედეგად „სატრანსპორო ინფრასტრუქტურის სააგენტო“ პასუხესმგებელია ქალაქში არსებული ქუჩების, ბორდიურების და ჭების მოწესრიგებაზე. მომავალი წლისთვის მერია ამ სამუშაოების შესასრულებლად ტენდერის გამოცხადებას აპირებს და შესაბამისად, კერძო პირი აიღებს ამ სამუშაოების შესრულებაზე პასუხისმგებლობას. ეს 12 მუშა კი, რომელიც პროფესიონალია და რამდენიმე წელია ამ საქმიანობას ასრულებენ, უმუშევარი რჩებიან“ – სატრანსპორტო ინფრასტრუქტურის მართვის სააგენტოს პროფკავშირების ხელმძღვანელი, სიმონ სიხარულიძე.
პროფკავშირების წარმომადგენელთა თქმით, მათი პრიორიტეტი დასაქმებულთა უფლებების დაცვაა და თუ ამ ადამიანებს მერია უმუშევრად დატოვებს, ისინი საპროტესტო აქციებს დაიწყებენ.
რატომ გადაწყვიტა მერიამ აღნიშნული სამსახურის რეორგანიზება და დარჩებიან თუ არა მუშები სამუშაოს გარეშე, „სატრანსპორტო ინფრასტრუქტურის მართვის სააგენტოს“ ხელმძღვანელის გიგა ჩხეიძის თქმით, რეორგანიზაციის გადაწყვეტილება მერიამ მიიღო:
„ქვაფენილების მოწესრიგებაზე შტატით 20 მუშა იყო დასაქმებული, რეორგანიზაციის შემდეგ კი ბუნებრივია მოხდება შტატების შემცირება. რეორგანიზაციის შედეგად, ქვაფენილების მოვლა-პატრონობა გადავა კერძო კომპანიის ხელში და ის რამდენ ადამიანს დაასაქმებს მისი გადასაწყვეტია. ჩვენ სააგენტოში მხოლოდ ხუთი მუშის დატოვებას ვაპირებთ“-აცხადებს გიგა ჩხეიძე.
ქვაფენილების მოვლა-შენახვაზე 2016 წლისთვის ტენდერი 35 ათას ლარზე უნდა გამოცხადდეს.
