ბათუმის #22-ე სკოლის (შარაბიძეების დასახლება) პედაგოგი ბავშვის ცემის გამო სამსახურიდან დაითხოვეს.
აჭარის განათლების მინისტრის მოადგილის სულიკო თებიძის ინფორმაციით, პედაგოგი რომლის წინააღმდეგაც მეოთხეკლასელი ბავშვის მშობელმა ადმნისტრაციას საჩივრით მიმართა, სამსახურიდან დაითხოვეს:
„ჩვენ არ გვაქვს უფლება ჩავერიოთ, გადაწყვეტილებას სკოლის დისციპლინარული საბჭო იღებს, თუმცა მე მაქვს ინფორმაცია, რომ ასეთი გადაწყვეტილება მართლაც მიიღეს და პედაგოგი დაითხოვეს“.
სკოლის დირექტორის გიორგი რუხაძის ინფორმაციით პედაგოგი ბავშვის ცემის ფაქტს არ აღიარებდა და ის ამბობდა, რომ ბავშვს ხელი შემთხვევით მოხვდა.
„მშობელი ბავშვთან ერთად მოვიდა სკოლაში, ბავშვს სახეზე სიწითლე ჰქონდა და ამბობდა, რომ მასწავლებელმა სცემა. მშობელმა ბავშვის სხვა პარალელურ კლასში გადაყვანა მოითხოვა, რადგან ბავშვს იმავე კლასში დაბრუნების ეშინოდა. მე მისი მოთხოვნა დავაკმაყოფილე და მასწავლებელს მოვთხოვე მოხსენებითი ბარათის დაწერა. მასწავლებელმა განმარტა, რომ ის „ვაიფაის“ აპარატის გამართვას ცდილობდა, რა დროსაც ხმაური მოესმა და უცებ შემობრუნდა, რის გამოც ბავშვს ხელი შემთხვევით მოხვდა. დისციპლინარულმა საბჭომ ის დამნაშავედ მიიჩნია და ხუთივე წევრმა მხარი დაუჭირა მის დათხოვნას რაც მე დავაკმაყოფილე“ – განაცხადა გიორგი რუხაძემ „ბათუმელებთან“. მისივე ინფრომაციით პედაგოგმა ადვოკატი აიყვანა, სკოლის დორექტორი ვარაუდობს, რომ გათავისუფლებული პედაგოგი სამსახურში აღდგენისთვის იბრძოლებს.
