Batumelebi | ჰომოსექსუალებს აქვთ უფლება ჰქონდეთ ოჯახები, ისინი ღვთის შვილები არიან – რომის პაპი ფრანცისკე ჰომოსექსუალებს აქვთ უფლება ჰქონდეთ ოჯახები, ისინი ღვთის შვილები არიან – რომის პაპი ფრანცისკე – Batumelebi
RU | GE  

ჰომოსექსუალებს აქვთ უფლება ჰქონდეთ ოჯახები, ისინი ღვთის შვილები არიან – რომის პაპი ფრანცისკე

რომის პაპი ფრანცისკე ერთსქესიანთა კავშირის დაკანონების მომხრეა. ამის შესახებ ის რომის კინოფესტივალზე ნაჩვენებ დოკუმენტურ ფილმში საუბრობს, რომელსაც „ფრანცისკე“ ჰქვია. ფილმი ოსკარზეა ნომინირებული. ინფორმაციას გამოცემა Reuters-ი ავრცელებს.

„ჰომოსექსუალებს აქვთ უფლება, ჰქონდეთ ოჯახები. ისინი ღვთის შვილები არიან და ამის უფლება აქვთ. ამის გამო არავინ უნდა იყოს უბედური. უნდა მივიღოთ კანონი სამოქალაქო კავშირზე, ასე ისინი კანონით იქნებიან დაცულები“, – ამბობს დოკუმენტურ ფილმში რომის პაპი.

როგორც ბრიტანულ გამოცემასთან რომის პაპის ბიოგრაფი, ოსტინ ივერი ამბობს, ეს იყო მისი ყველაზე ნათლად გამოხატული აზრი ლგბტ თემის საკითხებისადმი იმ დროიდან, რაც პაპად ეკურთხა: 2013 წლიდან დღემდე.

იეზუიტი სასულიერო პირი, მარტინ ჯეიმსი  Reuters– სთან ამბობს, რომ პაპ ფრანცისკეს ღია და საჯარო მხარდაჭერა ერთსქესიანთა კავშირისადმი ახალ ეტაპზე გადასვლას ნიშნავს ეკლესიისა და ლგბტ თემის ურთიერთობის საკითხებში, რაც ერთგვარი მინიშნებაა იმ ეპისკოპოსებისა და საეკლესიო მმართველებისთვის, რომლებიც ერთსქესიანთა კავშირების დაკანონების მოწინააღმდეგეები არიან.

კონსერვატორი კათოლიკეები რომის პაპისგან განცხადების განმარტებას ითხოვენ. როდ-აილენდის შტატის, პროვიდენსის ეპისკოპოს ტომას ტობინის განცხადებაში, მაგალითად, ნათქვამია, რომ პაპის განცხადება ერთსქესიანთა კავშირებზე ეკლესიის სწავლებას ღიად ეწინააღმდეგება და „ეკლესია ვერ დაუჭერს მხარს ამორალური კავშირების დაკანონებას“.

დოკუმენტურ ფილმში „ფრანცისკე“ ნაჩვენებია პაპის დამოკიდებულება მნიშვნელოვანი სოციალური პრობლემებისადმი, მისი ურთიერთობა მიგრანტებთან, ლტოლვილებთან და მისი დამოკიდებულება სასულიერო პირების მხრიდან სექსუალურ ძალადობაზე, ლგბტ თემის საკითხებზე.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com