20 ოქტომბრის მონაცემებით, გასული 24 საათის განმავლობაში ბათუმის კოვიდკლინიკებში 4 პაციენტი გარდაიცვალა კორონავირუსით.
ბათუმის საერთაშორისო ჰოსპიტალში კოვიდით გარდაიცვალა 82 წლის ქალი, რომელიც კლინიკაში 18 ოქტომბერს შეიყვანეს. 19 ოქტომბერს პაციენტი გარდაიცვალა. მისი დიაგნოზი იყო: „კოვიდ19, პნევმონია დაუზუსტებელი, სუნთქვის მწვავე უკმარისობა, შოკის სხვა ფორმები, სომნოლენცია. თანმხლები დაავადებები: თირკმლის ქრონიკული უკმარისობა, გულის უკმარისობა, მოციმციმე არითმია“.
ორი პაციენტი გარდაიცვალა ბათუმის რესპუბლიკურ საავადმყოფოში კორონავირუსით. 62 წლის ქალს ჰქონდა კორონავირუსი და, ასევე: „პნევმონია, რესპირატორული დისტრეს სინდრომი, სუნთქვის მწვავე უკმარისობა, შოკი, თირკმლის მწვავე უკმარისობა, შაქრიანი დიაბერი ტიპი 2, სიმსუქნე“.
ამავე კლინიკაში გუშინ გარდაიცვალა 65 წლის კაცი, რომელსაც 9 დღე მკურნალობდნენ. „ახალი კორონავირუსით გამოწვეული დაავადებები, პნევმონია, სუნთქვის მწვავე უკმარისობა, თანმხლები: ფილტვის კიბო, ფილტვის ობსტრუქციული დაავადება,“ – აღნიშნულია დიაგნოზში.
გუშინ 40 წლის ქალი გარდაიცვალა კორონავირუსით ბათუმის სამედიცინო ცენტრში. იგი კლინიკაში 19 ოქტომბერს, გამთენიისას შეიყვანეს, ხოლო საღამოს 8 საათზე ქალი გარდაიცვალა. „ახალი კორონავირუსით გამოწვეული დაავადებები, ორმხრივი პნევმონია, სუნთქვის მწვავე უკმარისობა, თირკმლის ჭვალი. თანმხლები: შაქრიანი დიაბეტი, თანდაყოლილი ცერებრული დამბლა,“ – აღნიშნულია დიაგნოზში.
გასული 24 საათის განმავლობაში საქართველოში 15 პაციენტი გარდაიცვალა კორონავირუსით.