Batumelebi | კორონავირუსის გამო დღეს 36 847 პირია იზოლირებული, რა მოხდება არჩევნების დღეს კორონავირუსის გამო დღეს 36 847 პირია იზოლირებული, რა მოხდება არჩევნების დღეს – Batumelebi
RU | GE  

კორონავირუსის გამო დღეს 36 847 პირია იზოლირებული, რა მოხდება არჩევნების დღეს

stopcov.ge-ს 20 ოქტომბრის ოფიციალური მონაცემებით, პანდემიის დაწყებიდან დღემდე საქართველოში კორონავირუსი სულ დაუდასტურდა 19 857 პირს. აქედან გამოჯანმრთელდა 8 666, ხოლო გარდაიცვალა 158 პირი.

თუ ამ მონაცემებს შევადარებთ, დღეს საქართველოში 11 033 კოვიდინფიცირებული პაციენტი უნდა იყოს. თუმცა საკოორდინაციო საბჭოს სხდომის შემდეგ ბრიფინგზე გაჟღერებული ინფორმაციით, ქვეყანაში დღეს 10 159 კოვიდინფიცირებული პაციენტია. ანუ, 874 ინფიცირებულის საკითხი გაურკვეველია.

„ბათუმელები“ შეეცადა გაერკვია, თუ რატომაა ასეთი ცდომილება მონაცემებში. პასუხი ვერც მთავრობის [144] და ვერც ჯანდაცვის [1505] ცხელ ხაზზე ვერ მივიღეთ. საბოლოოდ ჯანდაცვის სამინისტროს წერილობით მივმართეთ, თუმცა პასუხი ამ დრომდე არ მიგვიღია.

ოფიციალური სტატისტიკური მონაცემებით [20 ოქტომბრის 00 საათისთვის] საქართველოში:

  • კორონავირუსი დაუდასტურდა სულ – 19 857 პირს
  • მათ შორის გამოჯანმრთელდა – 8 666
  • გარდაიცვალა – 158
  • სტაციონარში იმყოფება – 2 817
  • კოვიდსასტუმროში – 1 672
  • ბინაზე კი მკურნალობს – 5 670 ინფიცირებული
  • კარანტინის რეჟიმშია  – 4 726
  • თვითიზოლაციაში კი – 21 962 პირი

ამ მონაცემების მიხედვით, დღეს რომ არჩევნები იყოს, საარჩევნო უბნებზე ვერ მივა 36 847 პირი, ანუ საერთო ამომრჩეველთა თითქმის 1% [თუმცა, არ გვაქვს ზუსტი მონაცემები იზოლაციაში მყოფი არასრულწლოვნების შესახებ].

ცენტრალური საარჩევნო კომისიის ინფორმაციით, კომისიას სახელმწიფო სერვისების განვითარების სააგენტომ 3 558 291 საარჩევნო ასაკის მქონე პირის მონაცემი გადასცა: „მონაცემები  ცესკოში დამუშავდება და უახლოეს მომავალში ამომრჩეველთა საბოლოო  რაოდენობა იქნება ცნობილი“.

ცესკოს ინფორმაციით სტაციონარულ სამკურნალო დაწესებულებებსა და იზოლაციაში მყოფი ამომრჩევლები 31 ოქტომბრის საპარლამენტო არჩევნებში მონაწილეობას შეძლებენ.

ამ თემაზე:

როგორ მისცემენ ხმას თვითიზოლაციაში და სტაციონარში მყოფი ამომრჩევლები

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com