16 ოქტომბერი მსოფლიო სურსათის დღეა. გაეროს სურსათისა და სოფლის მეურნეობის ორგანიზაციის (FAO) ინფორმაციით, ბოლო მონაცემებით, მსოფლიოში 2 მილიარდზე მეტ ადამიანს მუდმივად ხელი არ მიუწვდება უვნებელ და სასარგებლო საკვებზე.
„2050 წლისთვის კი მსოფლიო მოსახლეობა დაახლოებით 10 მილიარდს მიაღწევს, რაც მნიშვნელოვნად გაზრდის სურსათზე მოთხოვნას. ამ გლობალურ გამოწვევას, რომელიც საფრთხეს უქმნის სურსათის უსაფრთხოებას, კვების რაციონსა და საარსებო პირობებს, წელს COVID-19-ის პანდემია დაემატა“- წერს FAO.
„მსოფლიო სურსათის დღე“ გაეროს კალენდრის ერთ-ერთი ყველაზე მნიშვნელოვანი ღონისძიებაა, რომელიც მსოფლიოს 150-ზე მეტ ქვეყანაში აღინიშნება.
FAO მთელ მსოფლიოს მოუწოდებს, რომ სწრაფი და ეფექტიანი მოქმედებით, კიდევ უფრო მიუახლოვდეს გაეროს მდგრადი განვითარების მეორე მიზანს – შიმშილის აღმოფხვრას დედამიწაზე და ჯანსაღი საკვების საყოველთაო ხელმისაწვდომობას.
