Batumelebi | „ადგილი აღარ გვაქვს საწოლების ჩასადგმელად“ – ინტერვიუ რესპუბლიკურის დირექტორთან „ადგილი აღარ გვაქვს საწოლების ჩასადგმელად“ – ინტერვიუ რესპუბლიკურის დირექტორთან – Batumelebi
RU | GE  

„ადგილი აღარ გვაქვს საწოლების ჩასადგმელად“ – ინტერვიუ რესპუბლიკურის დირექტორთან

„ახლა სისტემა მიჩვენებს, რომ საწოლების რაოდენობა არის ნული, არცერთი საწოლი თავისუფალი არ არის,“ – გვითხრა სოლომონ ფუტკარაძემ, ის ბათუმის რესპუბლიკური საავადმყოფოს დირექტორია. სოლომონ ფუტკარაძე რამდენიმე დღის წინ დაუბრუნდა სამუშაო გარემოს, თუმცა ამბობს, რომ სრული დატვირთვით ჯერ კიდევ არ მუშაობს და დრო სჭირდება რეაბილიტაციისთვის. სოლომონ ფუტკარაძე კორონავირუსით იყო ინფიცირებული და თავად მკურნალობდა რესპუბლიკურში.

რესპუბლიკური საავადმყოფოს რეალობაზე სოლომონ ფუტკარაძეს რამდენიმე კითხვა დავუსვით.

  • ბატონო სოლომონ, რამდენი საწოლი დაამატეთ ბოლო დღეებში და გაქვთ თუ არა სივრცე, რომ უფრო მეტი პაციენტის მიღება შეძლოთ? 

ჩვენი კლინიკა არის გათვლილი 170 პაციენტზე და ამჟამად გვაქვს 212 საწოლი, ბოლო დღეებში დავამატეთ ეს საწოლები. მეტი სივრცე აღარ გვაქვს, უფრო ზუსტად სივრცე გვაქვს, მაგრამ იქ არ არის სველი წერტილები და ვერ დააკმაყოფილებს ნორმალური სერვისის პირობებს. ღმერთმა დაგვიფაროს და თუ მასობრივი ეპიდემია წავიდა, ყველაფერი შეიძლება, შესაძლებელია საოპერაციოები ჩვეულებრივ პალატებად გადაკეთდეს, რამდენიმე საწოლით გავზარდოთ.

  • რესპუბლიკურში მყოფი პაციენტები გვწერენ, რომ ბევრგან დაზიანებულია წყლის მილები და სველი წერტილებში ანტისანიტარიაა. 

ყოველდღე ხდება შემოვლა სამეურნეო ნაწილის მხრიდან და ასეთი ინფორმაცია არ შემოსულა ჩვენთან. შესაძლებელია, სადღაც ერთ პალატაში რაღაც მოხდა და ტექნიკურმა სამსახურმა გამოცვალა, ასეთი ამბავი ხვალაც შესაძლოა მოხდეს, ზეგაც და ოჯახშიც, ახალი საავადმყოფოა. ასეთ წვრილმან დეტალებზე თუ ვინმე გაამახვილებს ყურადღებას. არ ვიცი, მაქსიმალურად ჩართულია ტექნიკური სამსახური. ამას არ აქვს სისტემატური ხასიათი.

  • პაციენტების ნაწილი ამბობს, რომ მედპერსონალი აგვიანებს მათთან მისვლას და შესაბამის მომსახურებას. 

როცა პაციენტი თავსდება საავადმყოფოში, ვიდრე ანალიზები არ გაკეთდება, ხდება ლოდინი, ჯერ ექიმი ნახულობს და აფასებს მდგომარეობას. პაციენტების უმრავლესობას უნდა, რომ რადგან მოთავსდა პალატაში, ექიმი და ექთანი მიუჯდეს გვერდით, ეს ასე არ ხდება. ჯერ ერთი, პაციენტი თვითონ ინფიცირებულია და არ შეიძლება ყველა წუთში სიარული. გამოკვლევების და პროტოკოლის მიხედვით, დანიშნულების მიცემა ხდება და, შესაბამისად, ექთანი შედის და უკეთებს ინექციას, ასევე სანიტარი სხვადასხვა დროს ალაგებს პალატას და, შესაბამისად, ექიმთა გუნდი დღეში ორჯერ ატარებს შემოვლას, პაციენტებთან გასაუბრებაც ხდება, ექთანი შედის და რამდენჯერმე მანიპულაცია ხდება. სამედიცინო პერსონალს აქვს საკმარისი კონტაქტი.

  • სამედიცინო პერსონალის დეფიციტი არ გაქვთ? 

20 ექიმიც რომ დავიმატოთ, მაინც არ შევა პალატაში იმაზე მეტს, ვიდრე საჭიროა. რაღაც დეფიციტი გვექმნება პერიოდულად, როცა რამდენიმე [ექიმი] დაინფიცირდა, მაგრამ ახლა თბილსიდანაც ჩამოვიდნენ ექიმები, რამდენიმე სპეციალისტი… ასევე არსებობს გუნდი, რომელიც ზრუნავს მედპერსონალის გაძლიერებაზე და ვნახოთ.

  • პაციენტების აღწერით საუბარია კონკრეტული საჭიროების დროს ექიმის არარსებობაზე, როცა ექიმის დახმარებაა მთავარი. 

ახლა არ ვიცი, წინასაარჩევნო პერიოდია და შეიძლება პერიოდულად რაღაც გააკეთონ… გუშინ ჩემი ახლობელიც მოათავსეს კლინიკაში, მაღალი ტემპერატურა დაუფიქსირდა, რეგისტრაცია გაატარეს და 45 წუთი იცდიდა. იცით, როგორი ინტენსიური მოძრაობაა, ეს არ ნიშნავს, რომ ყურადღება არ მიაქციეს, წინ ხალხია და უკეთდება შესაბამისი პროცედურები, ამიტომ მოთმინების უნარი აკლიათ პაციენტებს – რადგან მოვიდა კლინიკაში, უნდა, რომ უცებ ყველაფერი გაკეთდეს. გაჭირვებულ კაცს, ხომ იცით, ყველაფერი იმ წამში უნდა, ყველაფერი იმ წამში ვერ იქნება.

  • მენეჯმენტში გყავთ ახალი დირექტორი თბილისიდან – ზაზა ავალიანი, რაში გეხმარებათ ის? 

ის გვეხმარება კლინიკურ ნაწილში. დაგვეხმაროს. ეს ჩვენთვისაც უკეთესია. თანაც, მე ჯერ კიდევ აქტიურად ვერ ვმუშაობ, ორშაბათიდან სრული დატვირთვით ვიმუშავებ, ჯერ დრო მჭირდება რეაბილიტაციისთვის, მკურნალობის კურსი სრულად არ დამისრულებია.

სოლომონ ფუტკარაძე

 

ნეტგაზეთის მასალების სხვა გამოცემებში გადაბეჭდვის წესი
ავტორი