Batumelebi | მერია ტენდერში ერთ კომპანიას ამარჯვებინებს, გარანტიას კი სხვა კომპანიას სთხოვს მერია ტენდერში ერთ კომპანიას ამარჯვებინებს, გარანტიას კი სხვა კომპანიას სთხოვს – Batumelebi
RU | GE  

მერია ტენდერში ერთ კომპანიას ამარჯვებინებს, გარანტიას კი სხვა კომპანიას სთხოვს

ბათუმის მერიის ა[ა]იპ საქალაქო ინფრასტრუქტურისა და კეთილმოწყობის სამმართველო ლერმონტოვის ქუჩა N96-ის მიმდებარედ სკვერის და იქვე საბავშვო ბაღის ეზოს მოწყობას გეგმავს, რაზედაც ტენდერი 806 684 ლარით აქვს გამოცხადებული.

სამმართველოს სატენდერო კომისიამ, 2020 წლის 13 ოქტომბრის ოქმის მიხედვით, ერთ-ერთი პრეტენდენტი, შპს „მონოლითი-2005“ ხელშეკრულების დასადებად მიიწვია, თუმცა, ამავე ოქმით, საბანკო გარანტიის წარმოდგენა სულ სხვა კომპანიას – შპს „იბერია ჯ“-ს მოსთხოვა.

საქალაქო ინფრასტრუქტურისა და კეთილმოწყობის სამმართველოს სატენდერო კომისიის 2020 წლის 13 ოქტომბრის ოქმიდან [N78-5]

„ბათუმელები“ საქალაქო ინფრასტრუქტურისა და კეთილმოწყობის სამმართველოს დაუკავშირდა.

„იბერია ჯ“ საერთოდ არ მონაწილეობდა ტენდერში, ეს არის მექანიკური შეცდომა და გამარჯვებული კომპანია არის „მონოლითი-2005“ – გვითხრეს სამმართველოს პრესსამსახურში.

ამ ოქმს კი, რომელიც შესყიდვების გვერდზეა ატვირთული, სატენდერო კომისიის 8 წევრი აწერს ხელს.

კიდევ ერთი „მექანიკური შეცდომაა“ ტენდერის ტექნიკურ დავალებაში. პრეტენდენტს ამ დავალებით არა მარტო ლერმონტოვის ქუჩა N96-ის მიმდებარედ სკვერის  და საბავშვო ბაღის ეზოს მოწყობას სთხოვენ, არამედ „თამარ მეფის გამზირზე არსებული სკვერის კეთილმოწყობის სამუშაოებსაც“.

ამონარიდი ტენდერიდან

„ბათუმელებს“ სამმართველოში უთხრეს, რომ აღნიშნული ტენდერი თამარ მეფის გამზირზე სკვერის კეთილმოწყობას არ ითვალისწინებს.

აღნიშნული ტენდერის გამო, სამმართველოს დავების საბჭოშიც უჩივლეს. შპს „გია კონსტრაქშენ“ სატენდერო კომისიის იმ ოქმის გაუქმებას ითხოვდა, რომლითაც მას დისკვალიფიკაცია მისცეს.

„გაცნობებთ, რომ არ ვეთანხმებით სატენდერო კომისიის სხდომის გადაწყვეტილებას, რადგან პირველ რიგში არასწორად არის დაანგარიშებული გამოცდილების ჯამური თანხა ჩვენს მიერ ატვირთული გამოცდილების ცხრილის მიხედვით, ამასთანავე გამოცდილებაში არ ჩაგვითვალა ერთ-ერთ კომპანიასთან შესრულებული სამუშაო…“ – აღნიშნულია საჩივარში.

შესყიდვების დავების საბჭომ „გია კონსტრაქშენის“ საჩივარი იმ მიზეზით არ მიიჩნია დასაშვებად, რომ გასაჩივრების ვადა, საჩივრის მიღების წინა დღით იყო ამოწურული. შესაბამისად, გაურკვეველია, სატენდერო კომისიამ კანონის დაცვით საგულდაგულოდ შეისწავლა პრეტენდენტის მიერ წარდგენილი დოკუმენტები თუ უბრალოდ, „მექანიკურად“ გადახედეს.

„გაცნობებთ, რომ საჩივრის დაუშვებლად ცნობის გასაჩივრება შესაძლებელია თბილისის საქალაქო სასამართლოს ადმინისტრაციულ საქმეთა კოლეგიაში“ – მიწერეს დავების საბჭოს აპარატიდან „გია კონსტრაქშენს“ 15 ოქტომბერს.

„გია კონსტრაქშენი“ საქალაქო ინფრასტრუქტურისა და კეთილმოწყობის სამმართველოს სამუშაოების შესრულებას 722 222 ლარად სთავაზობდა. მისი დისკვალიფიკაციის შემდეგ ხელშეკრულების გასაფორმებლად მიწვეული „მონოლითი-2005“ კი, იგივე სამუშაოებს სამმართველოს 15 555 ლარით ძვირად – 737 777 ლარად სთავაზობს.

 

მთავარი ფოტო: სკვერის ვიზუალი ლერმონტოვის 96-ის მიმდებარედ / ფოტო ტენდერიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com