საქართველოს დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, აჭარაში ჯერ კიდევ არ იგეგმება დაწესებული შეზღუდვების მოხსნა.
„აჭარაში, მიუხედავად იმისა, რომ სტაბილიზაციის პროცესი მიმდინარეობს, მაინც არ ჩაითვალა საჭიროდ იმ შემზღუდველი ღონისძიებების მოხსნა ამ ეტაპზე, ჯერ კიდევ რამდენიმე ხნის განმავლობაში, სანამ ერთი ინკუბაციური პერიოდი მაინც არ გავა.
იცით, იქ შიდა ტრანსპორტი არ მოძრაობს, სწავლა დისტანციურია, რესტორნები 10 საათის შემდეგ იკეტება და ა.შ.
სანამ გარკვეულ ნიშნულზე არ ჩამოვა სტაბილიზაცია, სანამ არ გვექნება სტაბილურად რამოდენიმე დღის განმავლობაში სულ მცირე ერთი კვირა მაინც, შედარებით მცირე რაოდენობა, მანამდე არ არის რეკომენდებული ამ შემზღუდველი ღონისძიებების მოხსნა“, – განაცხადა გამყრელიძემ.
კორონავირუსის ეპიდემიის შესაკავებლად შეზღუდვები აჭარაში 25 სექტემბერს დაწესდა. კერძოდ, აიკრძალა საზოგადოებრივი ტრანსპორტი, საღამოს ათი საათის შემდეგ რეგიონში არ მუშაობს რესტორნები და კაფე-ბარები, არ განახლდა სწავლა სკოლისა და სასწავლებლების შენობებში.
აჭარის მთავრობამ გასული კვირის ბოლოს დაანონსა შეზღუდვების მოხსნა, თუმცა დღეს, 12 ოქტომბერს, ამირან გამყრელიძემ განაცხადა, რომ მინიმუმ ერთი კვირის განმავლობაში თუ არ დაფიქსირდა ეპიდსიტუაციის სტაბილიზაცია, შეზღუდვების მოხსნა არ არის რეკომენდებული.
