„აჭარაში ხვალიდან, 22 საათიდან, რესტორნები აღარ იმუშავებენ, ამაზე დაწესდება შეზღუდვა, თუმცა დღის განმავლობაში რესტორნები იმუშავებენ, შეზღუდვა ეხება მხოლოდ ღამის საათებს.
ასევე, ხვალიდან აჭარის რეგიონში საზოგადოებრივი ტრანსპორტი მთლიანად გაჩერდება“ – განაცხადა დღეს, 24 სექტემბერს, საქართველოს მთავრობაში გამართულ ბრიფინგზე ნათია მეზვრიშვილმა, მთავრობის ადმინისტრაციის უფროსმა.
არ დასახელებულა შეზღუდვების ვადა, მთავრობის ადმინისტრაციის უფროსის განცხადებით, ვადა დაკონკრეტდება შექმნილი მდგომარეობიდან გამომდინარე.
სექტემბრის დასაწყისიდან დღემდე აჭარაში იზრდება კორონავირუსით ინფიცირებულ პირთა რაოდენობა. ბოლო დღეებში აჭარაში შეინიშნება ახალი შემთხვევების მატება. დღეს აჭარაში 164 ახალი შემთხვევა დადასტურდა.
