Batumelebi | ბათუმის მოხუცთა თავშესაფარში კოვიდის 6 შემთხვევაა, თავშესაფარში კარანტინია ბათუმის მოხუცთა თავშესაფარში კოვიდის 6 შემთხვევაა, თავშესაფარში კარანტინია – Batumelebi
RU | GE  

ბათუმის მოხუცთა თავშესაფარში კოვიდის 6 შემთხვევაა, თავშესაფარში კარანტინია

ბათუმში, საპატრიარქოს პატრონაჟის ქვეშ მყოფ მოხუცთა თავშესაფარში, კორონავირუსის 6 შემთხვევაა დადასტურებული. მათგან 1 ინფიცირებული თავშესაფრის თანამშრომელია, დანარჩენი კი თავშესაფარში მცხოვრებნი არიან.

თავშესაფრის დირექტორმა, დეკანოზმა იოანე ბარამიძემ „ბათუმელებს“ უთხრა, რომ ინფიცირების წყარო უცნობია და ამჟამად თავშესაფარში კარანტინია.

„ერთი ინფიცირებული თანამშრომელია, ოღონდ ორი კვირის განმავლობაში არ იმყოფება დაწესებულებაში, შვებულებაში იყო. ექვსიდან ხუთი სამწუხაროდ მობინადრეა. დილიდან, როგორც კი ინფიცირების შემთხვევა დადასტურდა, ისინი გადაიყვანეს საავადმყოფოში.

ყველა მობინადრეს და თანამშრომელს ჩაუტარდა ტესტირება და ველოდებით ტესტირების პასუხს.

ჩვენთან იმყოფებოდნენ ეპიდემიოლოგები, მოგვცეს რეკომენდაციები, როგორ უნდა მოვიქცეთ. ყველა მობინადრე და თანამშრომელი იმყოფება დაწესებულებაში, ვიმყოფებით კარანტინის მდგომარეობაში. ოღონდ ჩვენ კარანტინი გამოვაცხადეთ 2 სექტემბრიდან“, – ამბობს დეკანოზი იოანე.

მისივე თქმით, ერთი ინფიცირებული 38 წლისაა, დანარჩენები 50 წელს გადაცილებულები არიან, ერთი პირი კი 70 წლამდე ასაკისაა.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com