„8 რიცხვში გავიკეთე PCR ტესტი, 10 რიცხვში დამირეკეს ტესტი დადებითია და გადამიყვანეს ავადსახსენებელ რესპუბლიკურში. 11 რიცხვში მომივიდა შეტყობინება NCDC.ge-დან, სადაც მატყობინებენ, რომ 8 რიცხვში აღებული ტესტის პასუხი უარყოფითია. ვაჩვენე შეტყობინება ექიმებს და მიშვებდნენ სახლში, შევეწინააღმდეგე გაშვებასთან დაკავშირებით, რადგან ერთი დღე მომიწია აქ ღამის გათენება და მოვითხოვე განმეორებითი ტესტის ჩატარება. ეხლა მოვიდა პასუხი დადებითი! გამაგებინეთ რა ხდება ჯანმრთელი ადამიანი დამაინფიცირეთ?
პ.ს. რესპუბლიკურის მენეჯმენტი ნული…
არავინ არაფერი არ იცის, განუკითხაობა… “
ეს პოსტი ბათუმელმა ბექა ხალვაშმა ფეისბუქის საკუთარ გვერდზე დაწერა. ბექა ამ დროისთვის ბათუმის რესპუბლიკურ საავდმყოფოში მკურნალობს. მან საკუთარ სტატუსზე აჭარის ჯანდაცვის სამინისტრო და მინისტრი ნინო ნიჟარაძე მონიშნა, გამოაქვეყნა ასევე sms შეტყობინება, რომელიც მიიღო.
როგორც ჩანს, ბექა მარტო არ არის ბათუმში და მსგავსი შეტყობინება სხვა პაციენტებმაც მიიღეს, რომლებიც კორონავირუსის ინფექციით ბათუმის რესპუბლიკური საავადმყოფოს კოვიდცენტრში მკურნალობენ.
ამასთან დაკავშირებით აჭარის ჯანდაცვის მინისტრმა, ნინო ნიჟარაძემ აჭარის საზოგადოებრივ მაუწყებელთან განმარტა, რომ ეს იყო შეცდომით გადაგზავნილი შეტყობინება და კლინიკაში გადაყვანილი ყველა პაციენტის პასუხი დაინფიცირებასთან დაკავშირებით უტყუარია:
„ეს იყო ტექნიკური პორტალის შეცდომა, რომელიც იყო მუშა პროცესში, თუმცა ვისთანაც მივიდა ეპიდემიოლოგის ზარი, ეს იყო ასპროცენტიანი დადასტურებული და დაზუსტებული ინფორმაცია. ჩვენ ყველას ვეუბნებით, რომ ასეთი შეხმიანება და კონტაქტი არის ნამდვილად სარწმუნო. რაც შეეხება ამ შეცდომას, აღმოფხვრილია და მსგავსი ტიპის შეცდომები აღარ განმეორდება“, – თქვა ნინო ნიჟარაძემ აჭარის ტელევიზიასთან.
