საგანგებო სიტუაციების კოორდინაციისა და გადაუდებელი დახმარების ცენტრის ბათუმის რაიონული სამსახურის ერთ-ერთ მედიკოსს კოვიდ19 დაუდასტურდა.
უწყების ცნობით, ეპიდემიოლოგიურმა სამსახურებმა დაიწყეს ინფიცირების წყაროს კვლევა.
„ამ დროისთვის იდენტიფიცირებულია მედიკოსის კონტაქტები, რომლებიც იზოლაციასა და კარანტინში იმყოფებიან. კოვიდ 19-ზე ტესტირება პერიოდულად უტარდება ბათუმის სასწრაფო დახმარების სრულ მედპერსონალს, რომელთაგანაც ინფექცია არავის დადასტურებია.
ამჟამად, დამატებით პრევენციისთვის, განმეორებით ტარდება კვლევა ვირუსზე. ინფიცირებული მედიკოსი ბოლოს 4 სექტემბერს მორიგეობდა, რა დროისთვისაც მას უკვე ჩატარებული ჰქონდა ლაბორატორიული კვლევა კოვიდ 19-ზე და ვირუსი არ დაუდასტურდა. შესაბამისად, დაინფიცირების პერიოდში, მას მოსახლეობისთვის ბინაზე გადაუდებელი დახმარება არ გაუწევია“, – ვკითხულობთ განცხადებაში.
განცხადებაში ასევე აღნიშნულია, რომ საგანგებო სიტუაციების კოორდინაციისა და გადაუდებელი დახმარების ცენტრის ეკიპაჟები კორონავირუსთან დაკავშირებულ გამოძახებას სპეციალური აღჭურვილობით ასრულებენ და სამედიცინო დახმარებას უსაფრთხოების ყველა ნორმის გათვალისწინებით აწვდიან.