Batumelebi | უცხოელი სტუდენტი საქართველოში შემოსვლისას კარანტინის ხარჯს თავად აანაზღაურებს უცხოელი სტუდენტი საქართველოში შემოსვლისას კარანტინის ხარჯს თავად აანაზღაურებს – Batumelebi
RU | GE  

უცხოელი სტუდენტი საქართველოში შემოსვლისას კარანტინის ხარჯს თავად აანაზღაურებს

საქართველოს მთავრობის დადგენილებით, უცხოელი სტუდენტები ვალდებულნი არიან, საქართველოში შემოსვლის მიზნით, დარეგისტრირდნენ ელექტრონული წესით საქართველოს მთავრობის ვებგვერდზე – „StopCov.ge“ და შეავსონ სპეციალური აპლიკაცია – „საქართველოში შემომსვლელ უცხოელ სტუდენტთა რეგისტრაციის ფორმა“. უცხოელ სტუდენტებს სავალდებულო კარანტინის გავლაც მოუწევთ, რომლის ხარჯებსაც თავად სტუდენტი აანაზღაურებს.

 

დარეგისტრირება შესაძლებელია ამ ბმულზე

 

უცხო ქვეყნის მოქალაქე სტუდენტების საქართველოში შემოსვლის პროცედურები „იზოლაციისა და კარანტინის წესებს“ 9 სექტემბერს დაემატა. ამ პროცედურების მიხედვით, უცხოელი სტუდენტების რეგისტრაციის პროცესის ადმინისტრირებას ახორციელებს საქართველოს განათლების, მეცნიერების, კულტურისა და სპორტის სამინისტრო.

სამინისტრო ელექტრონულ პროგრამაში დარეგისტრირებული უცხოელი სტუდენტების საქართველოში შემოსვლასთან დაკავშირებით გასცემს თანხმობას ან უარს. თანხმობის ან უარის შესახებ ინფორმაციას უცხოელ სტუდენტებს ელექტრონული ფოსტის მეშვეობით აცნობებს შესაბამისი უმაღლესი საგანმანათლებლო დაწესებულება.

უცხოელი სტუდენტები, რომელთა მიმართაც საქართველოს განათლების სამინისტროს მიერ გაცემულია საქართველოში შემოსვლის თანხმობა, ვალდებული არიან, გაიარონ კარანტინი ამ დადგენილებით ფიზიკურ პირთა იზოლაციაში ან კარანტინში გადაყვანის წესებით განსაზღვრული ვადით. კარანტინში განთავსებასთან დაკავშირებული ხარჯების, ასევე სავალდებულო კარანტინის გავლის შემდგომ PCR ტესტირების ხარჯების ანაზღაურება ეკისრებათ უცხოელ სტუდენტებს. ამ მოთხოვნების დარღვევა გამოიწვევს პასუხისმგებლობას საქართველოს კანონმდებლობის შესაბამისად.

უმაღლესი საგანმანათლებლო დაწესებულება, სადაც სწავლობს უცხოელი სტუდენტი, ვალდებულია:

  • შეამოწმოს შესაბამისი უცხოელი სტუდენტის მიერ ელექტრონულ პროგრამაში შევსებული სპეციალური აპლიკაციის ფორმის სისწორე და თანხმობის გაცემამდე ელექტრონულ პროგრამაში ასახოს უცხოელ სტუდენტზე მოქმედი კანონმდებლობის შესაბამისად გაცემული ჯანმრთელობისა და უბედური შემთხვევის დაზღვევის დამადასტურებელი სადაზღვევო პოლისის რეკვიზიტები;
  • უზრუნველყოს უმაღლესი საგანმანათლებლო დაწესებულების მიერ მასთან ჩარიცხული უცხოელი სტუდენტების განთავსების მიზნით შერჩეულ სასტუმროში (ან განთავსების მსგავს საშუალებებში) საქართველოს ჯანდაცვის სამინისტროს რეკომენდაციების დაცვით მოწყობილ საკარანტინო სივრცეებში უცხოელი სტუდენტის გადაყვანა და განთავსება;
  • უცხოელი სტუდენტის კარანტინში ყოფნის პერიოდში გააკონტროლოს და კოორდინაცია გაუწიოს მასზე სამედიცინო მეთვალყურეობასა და დაცულობას;
  • უცხოელი სტუდენტისათვის, სტუდენტის სტატუსის შეჩერების/შეწყვეტის შესახებ სათანადო სამართლებრივი აქტის გამოცემიდან არაუგვიანეს სამი დღის ვადაში მიაწოდოს საქართველოს განათლების, მეცნიერების, კულტურისა და სპორტის სამინისტროს შესაბამისი ინფორმაცია.“.

საქართველოში სავალდებულო კარანტინი 12 დღეა, თუმცა უცხოეთიდან შემოსული პირებისთვის საკარანტინო ვადა 8 დღემდე მცირდება:

საკარანტინო ვადის 8 დღემდე შემცირება უცხოეთიდან შემოსულებს ეხება და არა ინფიცირებულებთან კონტაქტებს

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com