აჭარის საზოგადოებრივი ჯანდაცვის ცენტრის დირექტორის, რუსუდან შავიშვილის თქმით, გუშინ, 7 სექტემბერს, საკეისრო კვეთა გაუკეთეს ორსულ ქალს, რომელიც კორონავირუსით იყო ინფიცირებული.
როგორც რუსუდან შავიშვილი ამბობს, დედაც და ბავშვიც ამ ეტაპზე თავს კარგად გრძნობენ. „ბათუმელების“ კითხვაზე, დაიტესტა თუ არა ახალშობილი კორონავურისზე, შავიშვილი ამბობს, რომ ინფორმაცია არ აქვთ, რადგან საკეისრო კვეთა თბილისში, პირველ საუნივერსიტეტო კლინიკაში ჩატარდა.
„ბათუმელები“ საუნივერსიტეტო კლინიკას დაუკავშირდა, სადაც გვითხრეს, რომ ახალშობილი კორონავირუსზე დატესტილია, თუმცა ჯერ შედეგი ცნობილი არ არის. „ამ დროისთვის დედაც და ბავშვიც თავს კარგად გრძნობენ“, – გვითხრეს კლინიკის საზოგადოებასთან ურთიერთობის სამსახურში.
როგორც აჭარის საზოგადოებრივი ჯანდაცვის ცენტრში თქვეს, ინფიცირებულ ორსულს საკონდიტრო მაღაზია „დონასთან“ ჰქონდა კავშირი.
დღეს, 8 სექტემბერს, აჭარაში კორონავირუსის 21 ახალი შემთხვევა გამოვლინდა. ინფიცირებულთა რიცხვის ზრდის გამო, აჭარა წითელ ზონად გამოცხადდა.
