Batumelebi | ბსუ-ში ლექციები ონლაინ ჩატარდება, პრაქტიკულები კი – საუნივერსიტეტო სივრცეში ბსუ-ში ლექციები ონლაინ ჩატარდება, პრაქტიკულები კი – საუნივერსიტეტო სივრცეში – Batumelebi
RU | GE  

ბსუ-ში ლექციები ონლაინ ჩატარდება, პრაქტიკულები კი – საუნივერსიტეტო სივრცეში

ბათუმის შოთა რუსთაველის სახელმწიფო უნივერსიტეტმა 2020-2021 სასწავლო წლისთვის 1 291 პირველკურსელი მიიღო. ამის შესახებ ინფორმაცია „ბათუმელებს“ ბსუ-ს ადმინისტრაციამ მოაწოდა.

წელს ბსუ-ს ყველაზე მოთხოვნადი საგანმანათლებლო პროგრამებია:

  • სამართალმცოდნეობა
  • ფსიქოლოგია
  • ეკონომიკა
  • ქართული ფილოლოგია
  • განათლება

უნივერსიტეტის ადმინისტრაციის ინფორმაციით, პირველკურსელთა კონტინგენტი 95 პროცენტით შეივსო. „უკანასკნელი ოთხი წლის მონაცემებით, შევსების მაჩვენებელი 95%-96%-ს შორის მერყეობს.  1 365 გამოცხადებულ ვაკანტურ ადგილზე ჩარიცხვის უფლება  1 291-მა აბიტურიენტმა მოიპოვა, აქედან 104 გრანტის მფლობელია, ხოლო 400-მდე სახელმწიფოს მიერ დაფინანსებულ პროგრამებზე ჩაირიცხა“.

ბსუ-ში ასევე გვითხრეს, რომ გასულ წლებთან შედარებით, სრულად დაკომპლექტდა გერმანული და ფრანგული ფილოლოგიის მიმართულებები. ვაკანტური ადგილები მხოლოდ ბიოლოგიის, ტელეკომუნიკაციის და მშენებლობის მიმართულებით დარჩა, სადაც სავალდებულო იყო მათემატიკის ჩაბარება.

რაც შეეხება უცხოელ სტუდენტებს, ბსუ-ში ამ ეტაპზე 650-მდე უცხოელი სწავლობს. მათი ნაწილი (დაახლოებთ 300 სტუდენტი), როგორც ადმინისტრაციაში აცხადებენ, სამშობლოში დაბრუნდა. თუ სტუდენტები საქართველოში დაბრუნებას გადაწყვეტენ, მათთვის სპეციალური ჩარტერული რეისები დაინიშნება. წელს უნივერსიტეტში პირველკურსელი უცხოელი სტუდენტი არ მიუღიათ.

ადმინისტრაციაში ასევე გვითხრეს, რომ სასწავლო პროცესი ბსუ-ში როგორც ქართულ, ასევე  უცხოურ საგანმანათლებლო პროგრამებზე შერეული ფორმატით წარიმართება. კერძოდ, ლექციები ონლაინრეჟიმში ჩატარდება, ხოლო პრაქტიკული, ლაბორატორიული, ჯგუფური მუშაობა და სხვა აქტივობები – საუნივერსიტეტო სივრცეში, კოვიდუსაფრთხოების წესების გათვალისწინებით.

ახალი სასწავლო წელი უნივერსიტეტში სავარაუდოდ 21 სექტემბერს განახლდება.

_____________________

მთავარი ფოტო: ბსუ/ბათუმელების არქივიდან.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com