Batumelebi | 83 წლის კაცს გამოსახლება ელის – „20 წელია აქ ვცხოვრობ, მიწა არასწორად გაყიდეს“ 83 წლის კაცს გამოსახლება ელის – „20 წელია აქ ვცხოვრობ, მიწა არასწორად გაყიდეს“ – Batumelebi
RU | GE  

83 წლის კაცს გამოსახლება ელის – „20 წელია აქ ვცხოვრობ, მიწა არასწორად გაყიდეს“

„…გამოსახლებას მიპირებენ, არადა, უკვე 20 წელია აქ ვცხოვრობ. ვის არ მივმართე და მივწერე, მაგრამ პასუხსაც კი არ მცემენ,“ – ამბობს 83 წლის ოთარ ჯაიანი. ის თამარის დასახლებაში თვითნებურად დაკავებულ ტერიტორიაზე ცხოვრობს. აჭარის ფინანსთა და ეკონომიკის სამინისტრომ ოთარ ჯაიანის სახლი წლების წინ კომპანია GEOFIBRE-ს მიჰყიდა. კომპანია მოქალაქის გამოსახლებას სასამართლოში ითხოვს.

იურისტების განმარტებით, მოქალაქეს კანონით წლების წინ თვითნებურად დაკავებული ფართობის აღიარება ეკუთვნოდა და ეს სასამართლომაც დაადასტურა, თუმცა ვიდრე ეს დადგინდებოდა, სახელმწიფომ მიწის ნაკვეთი, სადაც ოთარ ჯაიანის ოჯახი თვითნებურად ცხოვრობს, კერძო კომპანიას მიჰყიდა. ეს 2013 წელს მოხდა. ახლა სახელმწიფო უწყებები მოქალაქეს აღარაფერს პასუხობენ იმის მიუხედავად, რომ 2008 წელს ოთარ ჯაიანთან ბათუმის მერიამ მემორანდუმი გააფორმა.

2008 წელს ბათუმის მერიასთან გაფორმებული მემორანდუმი.

„ჩვენ დამეწყრილი ოჯახები ვართ, მაქ მთავრობამ ჩაგვასახალა და მერე აღიარებაზე უარი მითხრეს… კრასნოდარში ვმსახურობდი ჯარში, ჩვენ ომის მონაწილეებთან გაგვათანაბრეს, ამის საბუთიც მაქვს… პირველი ჯგუფის ინვალიდი ვარ და ლაპარაკი მიჭირს. რეგისტრაცია არ გვაქვს, ვერც რამე პროგრამაში გვსვამენ, რადგან აღიარება არ ხდება, მე ის მაინტერესებს, პასუხის ღირსიც არ ვარ?“ – კითხულობს ოთარ ჯაიანი.

ოთარ ჯაიანს და კიდევ სხვა 60 ოჯახს თვითნებურად დაუკავებია სახელმწიფო საკუთრება 2000 წელს ბათუმში, თამარის დასახლებაში. 2008 წელს ოთარ ჯაიანთან გაფორმებული მემორანდუმის მიხედვით ჩანს, რომ მერია ამ ტერიტორიის აუქციონზე გატანას იმ პირობით აპირებდა, რომ თვითნებურად შესახლებულებს საცხოვრებლით დააკმაყოფილებდნენ. აუქციონი არ შედგა, მაგრამ მოქალაქეებს, რომლებსაც თვითნებურად ჰქონდათ დაკავებული ფართობები, საკუთრება უღიარეს, ოთარ ჯაიანის გარდა.

„…ადგილი, სადაც ოთარ ჯაიანი ცხოვრობს, კერძო კომპანიის საკუთრება გახდა. საქმე ისაა, რომ არასწორად მოამზადა კომპანიამ ნახაზი, მას ეს მიწის ნაკვეთი არც კი სჭირდებოდა, მაგრამ საბოლოოდ, კომპანიასთან შეთანხმება ვერ შედგა და სახელმწიფოც დაუდევრად მოიქცა, როცა ფინანსთა და ეკონომიკის სამინისტრომ გაასხვისა ქონება. სახელმწიფო დღეს ამაზე პასუხს არ აგებს იმის მიუხედავად, რომ მასთან მერიას მემორანდუმი აქვს გაფორმებული,“ – გვიყვება ანა ბერძენიშვილი, „საერთაშორისო გამჭვირვალობა საქართველოს“ იურისტი. იგი სასამართლოში ოთარ ჯაიანის ინტერესებს იცავს.

სასამართლოში ახლა 83 წლის ოთარ ჯაიანი ეკონომიკის სამინისტროს წინააღმდეგ დავობს, რომლის ქმედების გამოც მოქალაქის თვითნებურად დაკავებული მიწის ფართობი კერძო კომპანიის საკუთრება გახდა. მოქალაქე დავობს კომპანიის წინააღმდეგაც, რომელმაც ტექნიკური ნახაზი სამინისტროს არასწორად მიაწოდა.

ოთარ ჯაიანმა წერილობით ბათუმის მერიას მემორანდუმი რამდენჯერმე შეახსენა და რეაგირება მოითხოვა გასული წლის თებერვალსა და სექტემბერში, ასევე 2020 წლის ივლისში.

„…პასუხი საერთოდ არ მიგვიღია მერიიდან. დღეს ვიყავი მერიაში ამ საკითხზე და დაგვპირდნენ პასუხს,“ – დასძინა ანა ბერძენიშვილმა „ბათუმელებთან“.

ნეტგაზეთის მასალების სხვა გამოცემებში გადაბეჭდვის წესი
ავტორი