ოთხი დღეა ბათუმსა და ქობულეთში COVID19-ზე უფასო PCR ტესტირება მიმდინარეობს. ბათუმის ბულვარში ორ ადგილზე და ქობულეთის ზღვისპირა პარკში მოსახლეობას კორონავირუსზე უფასო PCR ტესტირება უტარდება.
აჭარის ჯანდაცვის სამინისტროს ინფორმაციით, კორონავირუსზე უფასო PCR ტესტი 214-მა ადამიანმა ჩაიტარა, მათგანის კვლევის პასუხი COVID19-ზე უარყოფითია.
სამინისტროს ცნობით, აჭარაში ასევე მიმდინარეობს ზღვისპირა ზოლში განთავსებული ღია ტიპის კაფე-ბარების, ღამის კლუბებისა და ბუნგალოების პერსონალის ტესტირება. კორონავირუსზე კვლევა ჩაუტარდა აღნიშნული დაწესებულებების 157 თანამშრომელს, პასუხები ამ შემთხვევაშიც უარყოფითია.
აჭარის ჯანდაცვის სამინისტროს ინფორმაციით, აჭარაში კორონავირუსზე გაფართოებული ტესტირება ინტენსიური ტურისტული სეზონის ბოლომდე გაგრძელდება.
ბათუმში კარვები განთავსებულია ბულვარში, კოლონადებთან და არდაგანის ტბასთან – „აჭარული სახლის“ მიმდებარე ტერიტორიაზე. აგრეთვე ქობულეთის მუნიციპალიტეტში, აღმაშენებლის ქუჩაზე, პარკის მიმდებარე ტერიტორიაზე. სამივე ადგილზე ნებისმიერ მსურველს ნიმუშის აღება ყოველდღიურად დღის მეორე ნახევრიდან შეუძლია.
სამინისტროს ცნობით, ტესტირება 17 -დან 22 საათამდე მიმდინარეობს. პირს, რომელიც ჩაიტარებს კვლევას, კოვიდის დადასტურების შემთხვევაში პასუხი 24 საათის განმავლობაში ეცნობება.
____________
ფოტო: აჭარის ჯანდაცვის სამინისტრო