პროფესიული განათლების ელექტრონული ჟურნალის პროგრამული უზრუნველყოფის შემუშავებისთვის 430 ათასი ლარია გამოყოფილი. მომსახურების შესყიდვაზე განათლების მართვის საინფორმაციო სისტემამ ელექტრონული ტენდერი გამოაცხადა. ელექტრონული ჟურნალი ხელშეკრულების გაფორმებიდან არაუგვიანეს 2020 წლის 30 დეკემბრამდე უნდა იყოს მზად.
„ელექტრონული ჟურნალის შექმნის მიზანია პროფესიული მასწავლებლის მიერ ჩატარებული საათების, სტუდენტის დასწრების და შეფასების გამარტივებული აღრიცხვა ერთიან ელექტრონულ სისტემაში. აღნიშნულ მონაცემებზე დაყრდნობით შესაბამისი გადაწყვეტილებების მიღება.
ჟურნალის მომხმარებლები იქნებიან პროფესიული საგანმანათლებლო დაწესებულების ადმინისტრაცია, პროფესიული მასწავლებელი და პროფესიული სტუდენტი. ყველა მომხმარებელს ექნება წვდომა, მხოლოდ მისთვის განსაზღვრულ მონაცემებზე. ჟურნალი უზრუნველყოფს მასწავლებლის მიერ ჩატარებული საათების დათვლას, რის საფუძველზეც მოხდება ანაზღაურების დაანგარიშება,“ – აღნიშნულია სატენდერო განაცხადში.
ახალ ელექტრონულ სისტემას ექნება მოდულები, რომლებიც ხილვადია სხვადასხვა მომხმარებლისთვის იმის მიხედვით, თუ რა უფლებები ექნება ჩართული მას. ეს მოდულებია:
[checklist]
- მომხმარებლის პროფილი
- ჯგუფები (უჩანს კოლეჯს)
- განრიგი (კოლეჯი და მასწავლებელი, სტუდენტი)
- აღრიცხვა/შეფასება
- უწყისები
- სასწავლო რესურსები
- კალენდარი
- შეტყობინებები
- განაცხადი
- რეპორტინგი
- მომხმარებელთა უფლებების მართვა
[/checklist]
„ახალი პროგრამა იქნება თანამედროვე სტანდარტების შესაბამისი, რომელიც ყველა აუცილებელ მოთხოვნას დააკმაყოფილებს,“ – უთხრეს „ბათუმელებს“ სსიპ „განათლების მართვის საინფორმაციო სისტემაში“.
