სპეციალური პენიტენციური სამსახური „კატეგორიულად უარყოფს“ ბელორუსიიდან საქართველოს სამთავრობო თვითმფრინავით მინდია ლავასოღლის ქვეყანაში ექსტრადაციას. მინდია ლავასოღლი ქურდული სამყაროს წევრობისთვისაა მსჯავრდებული. მისი საქართველოში სავარაუდო ექსტრადირების შესახებ ინფორმაცია მედიაში წუხელ, გვიან ღამით გავრცელდა.
მინდია ლავასოღლი ქურდული სამყაროს წევრობისთვის საქართველოში 2018 წელს გაასამართლეს. განაჩენის გამოტანამდე ის საპატიმრო დაწესებულებიდან გაუშვეს იმ მოტივით, რომ წინასწარი დაკავების ვადაში [9 თვე] სამართალდამცავებმა მას კანონიერი ქურდობა ვერ დაუმტკიცეს. ის თურქეთში გადავიდა. ლავასოღლი თურქეთში 2018 წლის ბოლოს დააკავეს და 2020 წლის 20 ივნისამდე საექსტრადაციო პატიმრობაში ჰყავდათ გაურკვეველი მიზეზით.
მინდია ლავასოღლის საექსტრადაციო პატიმრობიდან გათავისუფლების მოთხოვნით ბათუმში 2020 წლის პირველი ივნისიდან პერმანენტული საპროტესტო აქციები იმართებოდა, შიმშილობდა 15 ადამიანი.
20 ივნისს ცნობილი გახდა, რომ მინდია ლავასოღლი თურქეთში საექსტრადაციო პატიმრობიდან გაათავისუფლეს და იგი ბელორუსიაში გადავიდა. ამ ინფორმაციას თავდაპირველად საქართველოს პროკურატურა არ ადასტურებდა. ამ უწყებაში განმარტავდნენ, რომ საესტრადაციო პროცედურის დასრულებას ისევ თურქეთში ელოდნენ, თუმცა შემდეგ პროკურატურაში განაცხადეს, რომ ექსტრადირება საქართველომ ამჯერად ბელორუსიის ხელისუფლებას მოსთხოვა.
