Batumelebi | რა უნდა ქნათ, თუ სამუშაოდ თურქეთში წასასვლელად დადებითი პასუხი ვერ მიიღეთ რა უნდა ქნათ, თუ სამუშაოდ თურქეთში წასასვლელად დადებითი პასუხი ვერ მიიღეთ – Batumelebi
RU | GE  

რა უნდა ქნათ, თუ სამუშაოდ თურქეთში წასასვლელად დადებითი პასუხი ვერ მიიღეთ

აჭარის დასაქმების სააგენტოს მონაცემებით, 10 აგვისტოს მდგომარეობით, თურქეთში სამუშაოდ წასასვლელად სპეციალურ პროგრამაში სულ დარეგისტრირდა 423 მოქალაქე, რომელთაგან დადებითი პასუხი მიიღო 110-მა, დანარჩენს კი, დაეგზავნათ მოკლე ტექსტური შეტყობინებები დოკუმენტაციის დაზუსტებაზე.

სააგენტოს ინფორმაციით, შემუშავებულ იქნა ძირითადად სამი ალტერნატიული შეტყობინება, რომლითაც პირისათვის ცნობილი გახდება, თუ რა სახის ხარვეზია განცხადებაში და რის დაზუსტებას ითხოვს სამუშაო ჯგუფი:

sms ალტერნატივა 1: თქვენ მიერ წარმოდგენილი დოკუმენტაცია დასაზუსტებელია (არ ფიქსირდება პირადი N ან/და პერიოდი)

აღნიშნულ შეტყობინებას მიიღებენ ის ადამიანები, რომელთაც მიწვევაში არ უფიქსირდებათ პირადი ნომერი ან/და მიწვევის 3-თვიანი პერიოდი [ასეთი შეტყობინება უკვე მიიღო 128 მოქალაქემ];

sms ალტერნატივა 2: თქვენ მიერ წარმოდგენილია არასრული დოკუმენტაცია (წარმოსადგენია მოწვევა ან/და ნოტარიულად დამოწმებული ქართულენოვანი თარგმანი)

ამ შეტყობინების ადრესატები არიან პირები, რომელთა განცხადებებს არ ახლავს მიწვევა ან/და ნოტარიულად დამოწმებული ქართულენოვანი თარგმანი [ასეთი შეტყობინება უკვე მიიღო 26-მა მოქალაქემ];

sms ალტერნატივა 3: თქვენ მიერ წარმოდგენილი დოკუმენტაცია არ აკმაყოფილებს საქართველოს მთავრობის N164 განკარგულების მოთხოვნებს

აღნიშნულ შეტყობინებას მიიღებენ პირები, რომელთაც ატვირთული აქვთ სულ სხვა დოკუმენტაცია, ან მათი მიწვევის თარიღი აღემატება სამ თვეს [ასეთი შეტყობინება უკვე მიიღო 158-მა მოქალაქემ].

შეტყობინება, რომელიც ერთ-ერთმა მოქალაქემ მიიღო

მოქალაქეებს, რომლებსაც ამ სამი შეტყობინებიდან ერთ-ერთი მაინც მიუვიდა, დოკუმენტაციის დასაზუსტებლად და ხელახლა ასატვირთად, დრო შეზღუდული არ აქვთ. მათ შეუძლიათ განაახლონ დოკუმენტები და ხელახლა ატვირთონ იმავე პროგრამაში.

„როცა დოკუმენტაცია არ არის წესრიგში, ჩვენ უარყოფით პასუხს არავის ვაძლევთ, ვინაიდან ასეთ შემთხვევაში მათ აღარ ექნებათ დაზუსტებული დოკუმენტაციის ხელახლა ატვირთვის საშუალება. სამუშაო ჯგუფს დოკუმენტების განხილვისთვის, მართალია 7-დღიანი ვადა აქვს, მაგრამ რეგისტრირებული განცხადებების განხილვას ფაქტობრივად 48 საათში ვახერხებთ და შესაბამის შეტყობინებას ვუგზავნით განმცხადებელს“, – გვითხრა თემურ კახიძემ, აჭარის დასაქმების სააგენტოს ხელმძღვანელმა.

თემურ კახიძემ „ბათუმელებთან“ ორი დღის წინ განაცხადა, რომ სამუშაო ჯგუფის თანხმობა ანუ დადებითი პასუხი არ ნიშნავს იმას, რომ ეს მოქალაქე, ამ დადებითი პასუხის შემთხვევაში, აუცილებლად გადაკვეთს საზღვარს.

„ჩვენ ვსწავლობთ, აკმაყოფილებს თუ არა დარეგისტრირებული მოქალაქის მიერ ატვირთული დოკუმენტები პროგრამის კრიტერიუმებს. საზღვარზე კი, შესაბამისი უწყებები თავად წყვეტენ, აქვს ამ მოქალაქეს საზღვრის გადაკვეთის უფლება თუ არა. შესაძლოა არსებობდეს დეპორტაციის საკითხი ან სხვა რაიმე დარღვევები კონკრეტული მოქალაქის მიმართ, ამიტომ ასეთი მოქალაქე შესაძლოა ქართულმა მხარემ არ გადაუშვას საზღვარზე ან თურქეთის მხარემ არ შეუშვას ქვეყანაში. ასეთ დროს მოქალაქე, რომელიც საზღვარს ვერ გადაკვეთს და უკან დააბრუნებენ, კარანტინს არ გაივლის“, – განაცხადა 9 აგვისტოს „ბათუმელებთან“ თემურ კახიძემ.

თურქეთიდან დაბრუნებული საქართველოს მოქალაქე გაივლის 14-დღიან სავალდებულო კარანტინს. თემურ კახიძის განცხადებით, ამ მოქალაქეების კარანტინის ხარჯს სახელმწიფო დაფარავს.

თურქეთში სამუშაოდ წამსვლელი უნდა დარეგისტრირდეს სპეციალურ სისტემაში

დასარეგისტრირებლად გადადით ამ ბმულზე

აჭარის დასაქმების სააგენტოს ინფორმაციით, რეგისტრაციისთვის ორშაბათიდან – პარასკევის ჩათვლით, 10:00 საათიდან 18:00 საათამდე, შეგიძლიათ მიმართოთ ასევე სააგენტოს და მის განყოფილებებს შემდეგ მისამართებზე ან დაუკავშირდეთ ტელეფონის ნომრებზე:

  • ბათუმი: აჭარის დასაქმების სააგენტო. ივანე ჯავახიშვილის ქუჩა №70/72, ტელეფონი: (422) 24 78 84; მობ.: 577 278 703
  • ქობულეთი: აჭარის დასაქმების სააგენტოს ქობულეთის მუნიციპალური განყოფილება, დავით აღმაშენებლის ქუჩა №141, ტელეფონი: (426) 26 83 27; მობ.: 577 278 706
  • ხელვაჩაური: აჭარის დასაქმების სააგენტოს ხელვაჩაურის მუნიციპალური განყოფილება. დიდაჭარის ქუჩა №23, ტელეფონი: (422) 25 83 85; მობ.: 577 278 709
  • ქედა: აჭარის დასაქმების სააგენტოს ქედის მუნიციპალური განყოფილება. მერაბ კოსტავას ქუჩა №3. ტელეფონი: (425) 25 00 41; მობ.: 577 278 712
  • შუახევი: აჭარის დასაქმების სააგენტოს შუახევის მუნიციპალური განყოფილება, თამარ მეფის ქუჩა №30, ტელეფონი: (422) 25 83 85; მობ.: 577 278 709
  • ხულო: აჭარის დასაქმების სააგენტოს ხულოს მუნიციპალური განყოფილება. თამარ მეფის ქუჩა №12, ტელეფონი: (423) 27 00 70; მობ.: 577 278 716

ამავე თემაზე:

თურქეთში სამუშაოდ უკვე გადადიან, თანხმობა 101-მა მოქალაქემ მიიღო – სამინისტრო

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com