ბათუმი,მთავარი,სიახლეები

ქობულეთში, კინტრიშის ხეობაში, საპიკნიკეები, ცხენების თავლა და სხვა ტურისტული ობიექტები მოეწყობა 

07.08.2020 • 2406
ქობულეთში, კინტრიშის ხეობაში, საპიკნიკეები, ცხენების თავლა და სხვა ტურისტული ობიექტები მოეწყობა 

დაცული ტერიტორიების სააგენტო ქობულეთში, კინტრიშის ხეობის სოფლებში: ცხემვანში, ზერაბოსელსა და ხინოწმინდაში სხვადასხვა ტიპის ტურისტული ობიექტების მშენებლობა-რეაბილიტაციას გეგმავს.

ობიექტები კინტრიშის დაცული ტერიტორიების ადმინისტრაციის საკუთრებაში არსებულ მიწის ნაკვეთებზე განთავსდება, რისთვისაც ტენდერი 139 500 ლარით არის გამოცხადებული.

განმარტებითი ბარათის მიხედვით:

[highlight color=”red”]სოფელ ცხემვანში[/highlight] გათვალისწინებულია: ორი საპიკნიკისა და ცხენების თავლის მშენებლობა. ასევე არსებული სველი წერტილის რეაბილიტაცია.

თავლის პროექტი ითვალისწინებს 74 კვ/მ ფართობის კაპიტალურ შენობას ოთხი ცხენისთვის; შენობის გადახურვა – ფერადი თუნუქის ფურცლებით, შენობის მზიდი კედლებისა და ტიხრების აშენება – ბეტონის ბლოკებით; კარები ლითონის, ხოლო ფანჯრები მეტალოპლასტმასის. გათვალისწინებულია ელექტროენერგიის მიწოდება 150მ მანძილიდან, ასევე სასმელი წყლით მომარაგება არსებული ქსელიდან.

[highlight color=”red”]სოფელ ზერაბოსელში[/highlight] გათვალისწინებულია: ახალი საპიკნიკის მშენებლობა და არსებული სველი წერტილის რეაბილიტაცია.

[highlight color=”red”]სოფელ ხინოწმინდაში[/highlight] გათვალისწინებულია: ახალი საპიკნიკის მშენებლობა და არსებული სველი წერტილის რეაბილიტაცია.

დაგეგმილია საპიკნიკეებთან წყლის მიყვანა, წყაროს მოწყობა, ელექტრომომარაგება.

ტენდერში წინადადებების მიღება 21 აგვისტოს დაიწყება და 26 აგვისტოს შეწყდება. სამუშაოები კი უნდა დაიწყოს ხელშეკრულების გაფორმებისთანავე და დასრულდეს არაუგვიანეს 2020 წლის 10 დეკემბრისა.

„კინტრიშის დაცული ტერიტორიები მდებარეობს ქობულეთის მუნიციპალიტეტში და მისი საერთო ფართობი 13 514 ჰა-ს შეადგენს. იგი მოქცეულია მდინარე კინტრიშის ხეობაში, სოფ. ცხემვანსა და ხინოს მთებს შორის, ზღვის დონიდან 300-2500 მ-ის სიმაღლეზე. დაცულ ტერიტორიებს ჩრდილოეთით ქობულეთის სატყეოს ადმინისტრაციის ტერიტორიები, სამხრეთ აღმოსავლეთით შუახევის მუნიციპალიტეტის ტერიტორია, სამხრეთით ქედის მუნიციპალიტეტის ტერიტორია, სამხრეთ-დასავლეთით კი მტირალას ეროვნული პარკი ესაზღვრება. კინტრიშის დაცული ტერიტორიების ადმინისტრაცია ორ სხვადასხვა კატეგორიის დაცულ ტერიტორიას – სახელმწიფო ნაკრძალსა და დაცულ ლანდშაფტს მართავს“ – განმარტებითი ბარათიდან.

სანახაობა კინტრიშის ხეობაში: ტურისტულ ბილიკებზე მდებარე ჩანჩქერი, 2500-წლოვანი უთხოვარი, ქვის თაღოვანი ხიდი, ეკლესია, ტბიყელის ტბა, ენდემური სახეობის მცენარეები, ბზის კორომი და სხვ.

 

მთავარი ფოტო: კინტრიშის ხეობა / ივლისი, 2020 წ. / ფოტო: გურამ მურვანიძე/ბათუმელები

 

გადაბეჭდვის წესი


ასევე: