ქობულეთში, რუსთაველის ქუჩაზე ახალგაზრდა მამაკაცი ცეცხლსასროლი იარაღით დაჭრეს. „ევექსის“ ქობულეთის ჰოსპიტალში „ბათუმელებს“ უთხრეს, რომ პაციენტს ამბულატორიული მკურნალობა ჩაუტარდა, ფეხის არეში მიყენებული ჭრილობა დაუმუშავდა და იმავე ღამით გაწერეს კლინიკიდან.
„…ეს იყო გუშინწინ, დაახლოებით ღამის სამ საათზე შემოიყვანეს. მას დასჭირდა მცირე ქირურგიული ჩარევა და კლინიკიდან გავწერეთ,“ – ამბობს „ევექსის“ ქობულეთის ჰოსპიტლის დირექტორი, ირინე დოლიძე.
„ბათუმელების“ ინფორმაციით, დაჭრილი ქობულეთის სამაშველო სამსახურის უფროსის ძმაა. ამ ინფორმაციას რამდენიმე წყარო ადასტურებს. სამაშველო სამსახურის უფროსი ქობულეთში მამუკა ხაბაზია. მან „ბათუმელების“ სატელეფონო ზარს არ უპასუხა.
შინაგან საქმეთა სამინისტროში არ ადასტურებენ ინფორმაციას იმის შესახებ, რომ დაჭრილი სამაშველო სამსახურის უფროსის – მამუკა ხაბაზის ძმაა. უწყების პრესცენტრში გვითხრეს, რომ ამ დროისთვის დაკავებული არავინაა და გამოძიება მიმდინარეობს სისხლის სამართლის კოდექსის 117-ე [ჯანმრთელობის განზრახ მძიმე დაზიანება] და 236-ე [ცეცხლსასროლი იარაღის უკანონო შეძენა, შენახვა, გამოყენება] მუხლების შესაბამისად.
