საქართველოს ეკონომიკის მინისტრის, ნათია თურნავას განცხადებით, ოზურგეთი პირველი მუნიციპალიტეტი იქნება საქართველოში, რომელიც ფართოზოლოვანი ინტერნეტინფრასტრუქტურის განვითარების პროექტში ჩაერთვება.
ამის შესახებ მინისტრმა დღეს, 23 ივლისს, საკოორდინაციო საბჭოს სხდომის დასრულების შემდეგ განაცხადა.
„მიღებული იქნა გადაწყვეტილება, კონტრაქტი დაიდება და სამუშაოები დაიწყება საქართველოში ფართოზოლოვანი ინტერნეტინფრასტრუქტურის განვითარების პროექტის ფარგლებში. საუბარია ე.წ. „ოფენ ნეტის“ პროექტზე, რომელიც ხორციელდება ეკონომიკის სამინისტროს კოორდინირებით, ეს პროექტი ძალიან მასშტაბურია და საქმე ეხება ფართოზოლოვანი ოპტიკურ-ბოჭკოვანი ინტერნეტინფრასტრუქტურის გაყვანას მთელ საქართველოში, რაც მოიცავს ათასობით დასახლებულ პუნქტს“.
ნათია თურნავას განცხადებით, თავდაპირველად საპილოტე პროექტი განხორციელდება ოზურგეთის მუნიციპალიტეტში:
„უახლოეს თვეებში დაიწყება სამუშაოები, ხოლო წლის ბოლომდე უნდა დასრულდეს კიდევაც. საქმე პირველ ეტაპზე ეხება ოზურგეთის მუნიციპალიტეტის მასშტაბით 49 დასახლებულ პუნქტს, ეს არის 8 500 ოჯახზე მეტი, ვინც მიიღებს რამოდენიმე თვის განმავლობაში მაღალი სიჩქარის ინტერნეტს. პროექტი გაგრძელდება საქართველოს სხვა რეგიონებშიც“.
თურნავამ ხაზი გაუსვა, რომ კორონავირუსის პანდემიის პირობებში ინტერნეტინფრასტრუქტურის განვითარება განსაკუთრებით მნშვნელოვანია განათლების სისტემისთვის, ბიზნესისთვის, დისტანციური მუშაობისთვის და ა.შ.
