„ბათუმიველოს“ ველოსიპედები ბათუმში სულ მცირე სექტემბრის თვემდე არ გამოჩნდება. მერიის შპს „ბათუმის ავტოტრანსპორტმა“ გამოაცხადა ტენდერი მომსახურების შესყიდვაზე, რომელიც მოიცავს: 100 ცალ GPS ნავიგაციის მოწყობილობას ველოსიპედებისთვის, შესაბამისი პლატფორმით/სერვერით სარგებლობას და ადმინისტრირებას.
შესყიდვის სავარაუდო ღირებულება 200 ათას 500 ლარია.
„ავტოტრანსპორტის“ ინფორმაციით, საწყის ეტაპზე, ქალაქში ახალი სისტემის საშუალეთ, 100 ველოსიპედით სარგებლობა იქნება შესაძლებელი, რაც გულისხმობს ველოსიპედებით სარგებლობას მობილური აპლიკაციების სისტემის გამოყენებით და არა აქამდე არსებული ტერმინალებით. ეს ტერმინალები გაუქმდება.
„ახალი სისტემით შესაძლებელი იქნება ნახო, სად არის თავისუფალი ველოსიპედი და ასევე ის გააჩერო ნებისმიერ ადგილზე, როგორც მაგალითად „სქროლების“ შემთხვევაშია. დეტალური ინფორმაცია შეგვიძლია მოგვიანებით მოგაწოდოთ“, – გვითხრეს „ავტოტრანსპორტში“.
ტენდერში წინადადებების მიღება 2020 წლის 8 აგვისტოს დასრულდება. თუ ტენდერში გამარჯვებული გამოვლინდა, პირობის მიხედვით:
- GPS ნავიგაციის მოწყობილობის მიწოდების ვადად განსაზღვრულია, გამარჯვებულთან ხელშეკრულების გაფორმებიდან ერთი თვე;
- ველოსიპედების გაზიარების სერვისის უზრუნველყოფისთვის პლატფორმით მომსახურეობით სარგებლობა – ხელშეკრულების გაფორმებიდან 2022 წლის 31 დეკემბრის ჩათვლით, ყოველდღიურად, 24 საათის განმავლობაში;
- სერვისისთ სარგებლობა და ადმინისტრირება – ასევე, ხელშეკრულების გაფორმებიდან 2022 წლის 31 დეკემბრის ჩათვლით, ყოველდღიურად, 24 საათის განმავლობაში.
„ბათუმის ავტოტრანსპორტის“ ადმინისტრაციის უფროსი, მარად სანიკიძე, „ბათუმელებთან“ დაახლოებით ორი კვირის წინ აცხადებდა, რომ მათ ბალანსზე 360 ველოსიპედია, მიმდინარეობს სისტემის განახლება და ამ ველოსიპედების შეკეთება; დაახლოებით 15-20 დღეში კი ველოსიპედებს ქსელში დააბრუნებდნენ. მისივე თქმით, სავარაუდოდ რამდენიმე ადგილზე ველობარათის გამოყენებაც იქნებოდა შესაძლებელი, თუმცა, დღეს „ავტოტრანსპორტში“ გვითხრეს, რომ ბარათები აღარ იქნება.
ამ თემაზე ვრცლად:
რას უპირებს მერია „ბათუმიველოს“ – სისტემიდან ყველა ველოსიპედი ჩახსნილია
