ცხოვრება უსახურავო სახლში, როცა გარეთ თავსხმა წვიმაა [ვიდეო]

„ახლა მოდით და ნახეთ, როგორ  გვაწვიმს, იქნებ ვინმე დაგვეხმაროს, იქნებ სახურავის შეკეთების უფლება მოგვცენ“, – ეს შეტყობინება გამოგვიგზავნეს რედაქციაში დღეს, 21 ივლისს, ძლიერი წვიმის დროს. ოჯახი, რომელმაც ჩვენ მოგვწერა, ბათუმში, მარკოზ აჭარელის ქუჩაზე ცხოვრობს. სატელეფონო საუბარში გვითხრეს ისიც, რომ სახურავის კაპიტალურად მოწყობა უნდოდათ, თუმცა მუნიციპალურმა ინსპექციამ უნებართვო სამუშაოების შეჩერება მოითხოვა.

ადგილზე მისულებს ერთსართულიანი სახლი და ამ სახლის წინ წამოწყებული მშენებლობა დაგხვდა. ძველ სახლზე ახალი ფართობის მიშენება დაუწყიათ, რომელიც დაუსრულებელია, დაუსრულებელია სახლის გადახურვაც.

https://www.facebook.com/batumelebi/videos/1492022924319488/

ოჯახის წევრები სახლის იმ ნაწილში იყრიან თავს, სადაც წვიმა პირდაპირ არ ასხამს.

სახლის ახალაშენებულ ნაწილში ისე წვიმს, როგორც გარეთ, თუმცა წვიმის დროს ოჯახი თავს მაინც აქ აფარებს, იმის გამო, რომ ძველი სახლი ავარიულია და იქ დარჩენა ცუდი ამინდის დროს მათ სიცოცხლეს საფრთხეს უქმნის

ოჯახის წევრები ახალმიშენებულ და ნახევრად სახურავდახურულ ფართობში დაგვხვდნენ და გვითხრეს, რომ ძველი სახლი, განსაკუთრებით წვიმაში, უსაფრთხო არ არის. თინა ქამადაძის თქმით, ამიტომაც დაიწყეს ეზოში ახალი მშენებლობა, თუმცა მშენებლობის ნებართვა არ აქვთ.

„ნებართვის მისაღებად მერიას მივმართე, რამდენიმე სამსახურში გადამამისამართეს, ბოლოს მირიან მეტრეველთან გამაგზავნეს არქიტექტურაში, მან მითხრა ქონების მართვას უნდა მიმართოთო, თუმცა საბოლოოდ პასუხი ვერ მივიღე. მცირეწლოვანი ბავშვები გვყავს და საფრთხის ქვეშ რამდენ ხანს უნდა ვყოფილიყავით, ამიტომაც დავიწყეთ მშენებლობა“, – ამბობს თინა ქამადაძე.

ქამადაძეების ოჯახი 14-წევრიანია, მათ შორის 4 არასრულწლოვანია. ბავშვები ცუდი ამინდის გამო ნათესავებთან ჰყავთ გახიზნული.

ქამადაძეებს სახლში არც ელექტროენერგია აქვთ, რადგან აბონენტად დარეგისტრირებას ვერ ახერხებენ. ოჯახმა სოციალურად დაუცველის სტატუსისა და დახმარების მიღების იმედით სოციალური მომსახურების სააგენტოსაც მიმართა, თუმცა დახმარება ვერ მიიღეს.

საღამოს ექვსი საათისთვის ბათუმში წვიმა გაძლიერდა. ქამადაძეების ნახევრადგადახურულ სახლში  ალუმინის თასებზე დაცემული წვიმის წვეთების ძლიერი ხმაური ისმის. ამ ჭურჭლის დახმარებით დიასახლისი ცდილობს წვიმის შეკავებას.

ქამადაძეების ოჯახს არც ის მიწა ეკუთვნით, რომელზეც სახლს აშენებენ – მიწა სახელმწიფო საკუთრებაა.