შინაგან საქმეთა სამინისტროს ცნობით, საზღვარგარეთ მყოფ 2 ქართველ, ე.წ. კანონიერ ქურდს, 1977 წელს დაბადებულ ჯეირან კინწურაშვილს – მეტსახელად „ხონსკის“, 1963 წელს დაბადებულ თამაზ ქარცივაძეს – მეტსახელად „კუსას“ და „ქურდული სამყაროს“ წევრს – 1983 წელს დაბადებულ რ.პ.-ს ბრალი დაუსწრებლად წარედგინათ და მათი ძებნილად გამოცხადების მიზნით, ტარდება შესაბამისი პროცედურები.
შინაგან საქმეთა სამინისტროს ინფორმაციით, ჯეირან კინწურაშვილსა და თამაზ ქარცივაძეს ბრალი ედებათ „კანონიერ ქურდობაში“, რ.პ.-ს კი „ქურდული სამყაროს“ წევრობაში.
დანაშაული 3-დან 15 წლამდე ვადით თავისუფლების აღკვეთას ითვალისწინებს.
თამაზ ქარცივაძე ბათუმელია. იგი მრავალგზის ნასამართლევია. ამჯერად უცნობია, რომელ ქვეყანაში იმყოფება, თუმცა ბოლოს იგი 2018 წელს, მინდია ლავასოღლისთან და ჯეირან კინწურაშვილთან ერთად ე.წ. გარჩევაზე იმყოფებოდა თურქეთში, ხოფაში. მაშინ ამ შეხვედრის ვიდეოჩანაწერიც გავრცელდა და ითქვა ისიც, რომ არსებობდა დაპირისპირება ლავასოღლისა და კინწურაშვილს შორის.
2018 წლის სექტემბრეში კინწურაშვილის სახელი გაჟღერდა შს სამინისტროს მიერ გავრცელებულ ინფორმაციაში, როცა ქურდული სამყაროს წევრობის, ქურდულ შეკრებაში მონაწილეობისა და ქურდული სამყაროს მხარდაჭერის ბრალდებით, თბილისში, ქუთაისსა და წალკაში 6 პირი დააკავა. მაშინ შს სამინისტრომ განაცხადა, რომ ჯეირან კინწურაშვილმა და მინდია ლავასოღლიმ ერთ-ერთ პირს [ბრალდებულს], ე.წ. „მაყურებლის“ სტატუსი მიანიჭეს და მას წალკის მუნიციპალიტეტის სოფლებში ე.წ. „ქურდული საერთოს“ შეკრების ორგანიზება დაავალეს.
