Batumelebi | როდის განახლდება უცხო ენებისა და TOEFL სწავლების უფასო პროგრამა ბათუმში როდის განახლდება უცხო ენებისა და TOEFL სწავლების უფასო პროგრამა ბათუმში – Batumelebi

როდის განახლდება უცხო ენებისა და TOEFL სწავლების უფასო პროგრამა ბათუმში

ბათუმში განათლების ფონდის პროგრამა – უცხო ენებისა და კომპიუტერის შემსწავლელი კურსები, რომელიც მსმენელებისთვის უფასოა, კორონავირუსის გამო ქვეყანაში საგანგებო მდგომარეობს გამოცხადების შემდეგ  გაჩერებულია. პროგრამის ფარგლებში უცხო ენებს 600-მდე მოქალაქე სწავლობს.

„ბათუმელების“ კითხვაზე, როდის განახლდება პროგრამა და ხომ არ მიმდინარეობდა სასწავლო პროცესი ონლაინ, „აჭარის განათლების ფონდის“ ხელმძღვანელი რუსუდან ქავთარაძე ამბობს, რომ საგანგებო მდგომარეობის პერიოდში სასწავლო პროცესი შეჩერებული იყო.

„ახლა ვამზადებთ დისტანციურ პლატფორმას, რომ ონლაინრეჟიმში გადავიყვანოთ სასწავლო პროცესი. უახლოეს დღეებში დავტესტავთ პროგრამას, სავარაუდოდ, ეს იქნება ZOOM-ის პლატფორმაში. მსმენელებისგანაც იყო გამოხმაურება და მათაც აინტერესებთ, თუ როდის განახლდება პროგრამა“, – ამბობს რუსუდან ქავთარაძე.

სასწავლო პროცესის შეჩერების გამო, პროგრამაში დასაქმებულ მასწავლებლებს ანაზღაურება არ მიუღიათ – როგორც რუსუდან ქავთარაძე ამბობს, ხელშეკრულების მიხედვით, პედაგოგებს მხოლოდ ჩატარებული საათები უნაზღაურდებათ.

„თუკი სწავლება განახლდება დისტანციურად, ამ შემთხვევაში  პროგრამაში დასაქმებული პედაგოგები მიიღებენ ანაზღაურებას ყველა ჩატარებულ საათზე“.

რუსუდან ქავთარაძის თქმით, ჯამში 49 ჯგუფია დაკომპლექტებული, მიმდინარე წელს კი ქართული ენის შემსწავლელი ჯგუფიც  დაემატა. პროგრამის ბენეფიციარები უცხოელები არიან, რომლებსაც საქართველოს მოქალაქეობის მიღება სურთ.

ქავთარაძის თქმით, განახლდება თუ არა პროგრამა დისტანციურად, დაახლოებით ერთ-ორ კვირაში იქნება ცნობილი.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com