„ჩვენ არ ვაპირებთ შიმშილობის შეწყვეტას, ვიდრე არ გვეტყვიან კონკრეტულ თარიღს, როდის მოხდება ლავასოღლის ექსტრადაცია საქართველოში,“ – ამბობს ნიკოლოზ ხრიკაძე. ის ერთ-ერთია ქურდული სამყაროს წევრობისთვის გასამართლებული მინდია ლავასოღლის ახლობლებიდან, რომელიც პროკურატურასთან შიმშილობს. ლავასოღლი მეორე წელია საექსტრადაციო პატიმრობაში თურქეთში. შიმშილობა გუშინ ხუთმა ადამიანმა დაიწყო.
ნიკოლოზ ხრიკაძის თქმით, დღეს მოშიმშილეთა რაოდენობა 20-მდე გაიზრდება, საპროტესტო აქცია კი, პროკურატურის წინ სამ საათზე გაიმართება.
„გაშლილი გვაქვს ორი კარავი, გუშინ აქ გავათენეთ, სასწრაფო დღეს მოვა და შეგვამოწმებს… ლავასოღლი დროულად უნდა გადმოსცენ საქართველოს, მას ამის უფლება აქვს,“ – აღნიშნა „ბათუმელებთან“ ნიკოლოზ ხრიკაძემ.
პროკურატურაში არ განმარტავენ, რის გამო ვერ ხერხდება ამ დრომდე მინდია ლავასოღლის ექსტრადაცია. პროკურატურიდან მოგვწერეს: „საქართველოს პროკურატურის შუამდგომლობის საფუძველზე თურქეთის რესპუბლიკის კომპეტენტური ორგანოები განიხილავენ ძებნილი მინდია ლავასოღლის საქართველოში ექსტრადაციას. მოცემულ ეტაპზე მიმდინარეობს შესაბამისი საერთაშორისო ხელშეკრულებებით გათვალისწინებული საექსტრადაციო პროცედურები.“
მინდია ლავასოღლის ექსტრადაციის მოთხოვნით გუშინ, პირველ ივნისს, საპროტესტო აქცია თურქეთის საკონსულოსთან დაიწყო, რომლის შემდეგაც აქციის მონაწილეებმა აჭარის ტელევიზიას პირდაპირი ეთერი მოსთხოვეს. ეთერში ჩართვის შემდეგ, საპროტესტო აქცია პროკურატურასთან გააგრძელეს. აქციის მონაწილეებმა პროკურატურიდან ისევ თურქეთის საკონსულოსთან გადაინაცვლეს, საბოლოოდ კი, ისევ პროკურატურასთან მივიდნენ.
მინდია ლავასოღლის განაჩენი საქართველოში 2018 წელს გამოიტანეს, თუმცა იგი იმ დროს საქართველოში არ იმყოფებოდა.
