ბაშკირეთის პროკურატურამ მოკვლევა დაიწყო მას შემდეგ, რაც მასმედიის ადგილობრივმა საშუალებებმა გაავრცელეს ინფორმაცია არხანგელსკის საავადმყოფოს ორი მედდის შესახებ, რომლებიც კორონავირუსის გამო ღამით იზოლაციისთვის ჩაკეტეს მორგში. ინფორმაციას BBC ავრცელებს.
რუსეთის ჯანდაცვის სამინისტრო ადასტურებს, რომ მედდები მართლაც პათანატომიის განყოფილებაში იყვნენ იზოლატორში, თუმცა განმარტავენ, რომ განყოფილებაში ამ დროს გვამები არ იყო.
როგორც BBC წერს, უწყებაში ამბობენ, რომ საავადმყოფოს ერთ შენობაში ორი განყოფილებაა: პათანატომიის, სადაც გვამებს ინახავენ, გვერდით კი ლაბორატორია, რომელიც Covid 19-ით ინფიცირებულებთან კონტაქტში მყოფი მედიკოსების საიზოლაციო სივრცედ გამოიყენებოდა.
ჯანდაცვის ადგილობრივი ორგანიზაცია აცხადებს, რომ იზოლატორში პროტოკოლით გათვალისწინებული ყველა პირობაა შექმნილი: არის შხაპი, ტუალეტი და საწოლი. მათივე განცხადებით, ამბის გახმაურება მედდების სტრესმა გამოიწვია, მიუხედავად იმისა, რომ მათ ჰქონდათ დაწესებულების გასაღები და შეეძლოთ დაეტოვებინათ შენობა, როცა სურდათ.
თუმცა როგორც გამოცემა Proufu.ru წერს, თავად მედდები ამბობენ, რომ მათ სისხლის სამართლებრივი დევნითა და სამსახურიდან გათავისუფლებით დაემუქრნენ. გამოცემისთვის მედდების მიერ მიცეული ინტერვიუს მიხედვით, მათ ორი მცველი მეთვალყურეობდა, შენობა რომ არ დაეტოვებინათ.
_____________
ფოტო: proufu.ru
