Batumelebi | გიორგი ანწუხელიძის ქუჩა ბათუმში უკუღმა დანომრეს გიორგი ანწუხელიძის ქუჩა ბათუმში უკუღმა დანომრეს – Batumelebi
RU | GE  

გიორგი ანწუხელიძის ქუჩა ბათუმში უკუღმა დანომრეს

გზის მონაკვეთს, რომელიც ახალ ბულვარის გაგრძელებაზე, ლეხ და მარია კაჩინსკების ქუჩის დასასრულიდან იწყება და აეროპორტის გზატკეცილამდე გრძელდება, ეროვნული გმირის, გიორგი ანწუხელიძის სახელი 2018 წლის თებერვალში მიანიჭეს. საქართველოს რუკის ფორმის აბრების გაკვრა კი შარშან აგვისტოში დაიწყო მერიამ. პროცესში ბათუმის მერი და საკრებულოს თავმჯდომარეც მონაწილეობდნენ.

როგორც ამ ქუჩის მცხოვრებლები ამბობენ, ეს ერთადერთი ქუჩაა ბათუმში, რომელიც საპირისპირო მიმართულებით დანომრეს.

ბათუმში ქუჩები, რომლებიც ვერტიკალურადაა განლაგებული ბულვართან მიმართებაში, ზღვიდან მთის მიმართულებით არის დანომრილი, ხოლო ბულვარის პარალელური ქუჩები – პორტის სანაპიროდან აეროპორტის მიმართულებით. გამონაკლისია ანწუხელიძის ქუჩა, რომელიც ვერტიკალური ქუჩების საპირისპიროდ დანომრეს.

მაგალითად, იგივე ანწუხელიძის ქუჩის პარალელური ქუჩები ზღვის მხრიდან [კაჩინსკების ქუჩიდან] აეროპორტის გზატკეცილის მიმართულებით არის დანომრილი [ადლიის ქუჩა, ზღვისპირის ქუჩა, გრიგოლ ლორთქიფანიძის ქუჩა]. ზღვის მხრიდან არის დანომრილი კობალაძის ქუჩაც.

რატომ დანომრეს ანწუხელიძის ქუჩა უკუღმა [აეროპორტის გზატკეცილიდან ზღვის მიმართულებით], უბრალოდ, ტექნიკური შეცდომა იყო თუ რაიმე პრინციპით განისაზღვრა? – ვიკითხეთ მერიაში. როგორც ბათუმის მერიის კეთილმოწყობის სამსახურში გვითხრეს, ქუჩა ნამდვილად საპირისპირო მიმართულებითაა დანომრილი, თუმცა რატომ, ზუსტი პასუხი არ აქვთ.

„საჯარო რეესტრი ანიჭებს ქუჩებს ნომრებს, მერე მოდის წერილი გამგეობიდან, ჩვენ ვაცხადებთ ტენდერს აბრებზე. სხვა, ჩვენ არ გვეხება“, – გვითხრა მერიის კეთილმოწყობის სამსახურის უფროსის მოადგილემ, სულხან ტყეშელიაძემ.

მან საუბარში ასევე დასძინა, რომ გაუგებრობის მიზეზი შესაძლოა  იყოს ის, რომ აღნიშნულ უბანში „რაღაც არეულობაა“.

„ეგ მონაკვეთი როცა გაიჭრა, ადრე მანდ ყანები თუ რაღაც იყო, მაგ უბანში ერთ-ერთი მისასვლელი გზა იყო მხოლოდ ინასარიძის ქუჩიდან. ანწუხელიძის ქუჩისთვის აბრები რომ გავამზადეთ და მივედით დასანომრად, აღმოჩნდა, რომ საჯარო რეესტრს ჰქონია დარეგისტრირებული სარფიდან. ანუ ნუმერაცია არა ზღვიდან, არამედ სარფის მხრიდან იწყებოდა. ავუხსენით მერსაც, მაგრამ… რაღაც არეულობაა მანდ ქუჩების“, – ამბობს სულხან ტყეშელიაძე.

მისი თქმით, ანწუხელიძის სახელის მინიჭებამდეც  გაურკვეველი იყო ამ ქუჩაზე არსებული სახლების ნუმერაცია.

„თვითონ მოსახლეობამაც კი არ იცოდა მისი სახლის მისამართი რა იყო. ბერა ივანიშვილი აპირებდა ადრე მანდ კლიპის გადაღებას და ტაქსის რომ იძახებდნენ, გზას ვერ იკვლევდა, ვერ აგნებდა, სად უნდა მისულიყო. ლოგიკას არ ექვემდებარებოდა ისე არეულ-დარეული იყო მისამართები“, – ამბობს ტყეშელიაძე.

აეროპორტის ადმინისტრაციული ერთეულის სერვისცენტრის მენეჯერი, სულიკო გოგოლიშვილი ამბობს, რომ ქუჩების ნუმერაციის საკითხში გამგეობა არ ერევა, ამიტომ არ იცის, რა პრინციპით იხელმძღვანელა იუსტიციის სახლმა ანწუხელიძის ქუჩის დანომვრისას.

„ნუმერაციას თვითონ აკეთებს და შეიძლება იმ გარემოებიდან გამომდინარე, რომ იქ ქუჩები ცოტა არეულია“, – ამბობს გოგოლიშვილი.

____

საქართველოს ეროვნული გმირი, გიორგი ანწუხელიძე, 2008 წლის აგვისტოს რუსეთ-საქართველოს ომის დღეებში, 9 აგვისტოს დაიღუპა. ის ერთ-ერთი შეტაკების შემდეგ ტყვედ ჩაუვარდა მოწინააღმდეგეს. წამებისა და დაკითხვის შემდეგ კი ცხინვალის მე-5 სკოლასთან, ძმათა სასაფლაოზე ცემით მოკლეს.

გიორგი ანწუხელიძე 24 წლის ასაკში დაიღუპა.

მთავარი ფოტო: „ბათუმელების“ არქივი/ანწუხელიძის ქუჩაზე საქართველოს რუკის ფორმის აბრებია გაკრული.

 

ამავე თემაზე:

საქართველოს რუკის ფორმის აბრები ანწუხელიძის ქუჩაზე

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com