Batumelebi | როცა ზღვასთან სახელმწიფო მიწაზე რესტორანი გაქვს და პლაჟიც გჭირდება როცა ზღვასთან სახელმწიფო მიწაზე რესტორანი გაქვს და პლაჟიც გჭირდება – Batumelebi

როცა ზღვასთან სახელმწიფო მიწაზე რესტორანი გაქვს და პლაჟიც გჭირდება

ბათუმში, თამარ მეფის გამზირზე, ზღვის პირას მიწის ნაკვეთს პირდაპირი განკარგვის წესით შპს „უტევანი“ ითხოვს. ეს იმას ნიშნავს, რომ კომპანიამ ნაკვეთის განკარგვაზე უფლება აუქციონისა და კონკურენციის პირობების გარეშე უნდა მიიღოს. მოთხოვნილი ტერიტორიის გვერდით, ასევე ბათუმის მუნიციპალიტეტის საკუთრებაში არსებულ  ნაკვეთზე რესტორანი „რივიერა“ ფუნქციონირებს.

მერია თანახმაა კომპანიას 478 კვადრატული მეტრი ტერიტორია მოთხოვნილი პირობებით – წელიწადში 15 000 ლარად გადასცეს კომპანიას, რაც ერთ კვადრატულ მეტრზე წელიწადში 31,38 ლარია. განკარგულების პროექტის მიხედვით ფასი აუდიტმა დაადგინა.

მერიის ინფორმაციით, სწორედ ამ ნაკვეთის მართვის უფლებაზე, სადაც  რესტორანი ფუნქციონირებს, იმავე კომპანიას მერიასთან საიჯარო ხელშეკრულება 2010 წელს, 29-წლიანი მართვის უფლებით, 2551 კვ.მ აქვს გაფორმებული. მაშინ მერიამ საიჯარო ხელშეკრულებით მხოლოდ ნაკვეთი გაასხვისა, შენობა მოიჯარის აშენებულია. მიწის ნაკვეთს კომპანია ამჯერად 2039 წლის ჩათვლით ითხოვს.

შპს „უტევანი“ ბათუმის მერიას ჰპირდება, რომ თუ მიწის ნაკვეთს იჯარით გადასცემენ, მას „კეთილმოაწყობს და მოემსახურება როგორც ადგილობრივ მოსახლეობას, ასევე ტურისტებს.“

კომპანიის მეპატრონე ამჯერად მერიას ჰპირდება, რომ თუ დამატებით მოთხოვნილ ტერიტორიას 2039 წლამდე იჯარის წესით მიიღებს, მასზე ტურისტულ ინფრასტრუქტურას განავითარებს, კონკრეტულად, რას გააკეთებს, პირობების შესახებ განკარგულების პროექტში აღნიშნული არ არის.

საჯარო რეესტრის მონაცემებით, 2010 წელს, როდესაც კომპანიამ მერიასთან პირველი საიჯარო ხელშეკრულება გააფორმა, შპს „უტევანის“ ერთპიროვნული მფლობელი მერაბ წერეთელი იყო.

დოკუმენტების მიხედვით, მერაბ წერეთელმა კომპანიის 100 პროცენტი 700 ათას დოლარად გაყიდა და 2017 წლიდან კომპანიის მფლობელი ჯემალ ბათაძე გახდა. მერაბ წერეთელი კი, კრედიტორად დაფიქსირდა. რეესტრშივე აისახა ამ თანხის ეტაპობრივად დაფარვის პირობები.

2019 წლის იანვარში კი, ჯემალ ქათამაძემ კომპანია ჯემალ ბათაძისგან იმავე პირობით და იმავე ფასად შეისყიდა, მერაბ წერეთელი ისევ კრედიტორად დარჩა. ჯემალ ქათამაძე „უტევანის“ ასივე პროცენტის მფლობელი  და დირექტორია.

მიწის იჯარით გაცემის საკითხი ბათუმის საკრებულომ 29 მაისს დაგეგმილ სხდომაზე უნდა განიხილოს.

ნეტგაზეთის მასალების სხვა გამოცემებში გადაბეჭდვის წესი
ავტორი