დიდმა ბრიტანეთმა ქართველი მეზღვაურების სერტიფიკატები აღიარა. რაც იმას ნიშნავს, რომ ქართველ მეზღვაურებს უფლება ექნებათ, დიდი ბრიტანეთის დროშის ქვეშ მცურავ გემებზე დასაქმდნენ. საქართველოსა და დიდი ბრიტანეთის გაერთიანებულ სამეფოს შორის მეზღვაურთა სერტიფიკატების ურთიერთაღიარების მემორანდუმს ხელი უკვე მოაწერეს.
„სახელმწიფოს ძალისხმევის შედეგად მივაღწიეთ დიდი ბრიტანეთის გაერთიანებული სამეფოს მიერ ჩვენი მეზღვაურების აღიარებას. ეს არის უდიდესი გამოწვევა და შესაძლებლობა ჩვენი კერძო სექტორისთვის: საკრუინგო კომპანიებსა და ქართველ მეზღვაურებს გაეხსნათ მსოფლიოში ერთ-ერთი საუკეთესო დასაქმების ბაზარი,“ – ნათქვამია საზღვაო ტრანსპორტის სააგენტოს ხელმძღვანელის თამარ იოსელიანის განცხადებაში, რომელიც სააგენტოს პრესსამსახურმა გაავრცელა.
საზღვაო ტრანსპორტის სააგენტოს ინფორმაციით, ამ აღიარებით დასაქმებისთვის იხსნება ისეთი დროშები, როგორებიცაა: კაიმანი, მენის კუნძულები, გიბრალტარი და ბრიტანეთის სხვა დამოკიდებული ტერიტორიები.
„ამავდროულად დიდი ბრიტანეთის აღიარება საქართველოს საზღვაო განათლების და სერტიფიცირების სისტემისათვის ნდობის გამოცხადებაა, რაც წლების დაუღალავი შრომის შედეგია და ვფიქრობ, რომ ეს ქართული საზღვაო სექტორის მნიშვნელოვანი მიღწევაა საერთაშორისო ასპარეზზე,“ – ამბობს თამარ იოსელიანი.
გაერთიანებული სამეფოს დროშების ქვეშ მსოფლიოში სიდიდით მე-18 ადგილზე მყოფი სავაჭრო ფლოტია (Deadweight tonnage basis), რომლის ქვეშ 1300-ზე მეტი გემი დაცურავს. 2018 წლის ბოლოს დროშის საერთო ტევადობა (Gross Tonnage) 16 მილიონი იყო.
