23 წლის მეგი 4 თვეა საწოლსაა მიჯაჭვული. სამედიცინო დიაგნოზის მიხედვით, მას სპინალური შოკი აქვს. ტრაგიკული შემთხვევა, რომელმაც ახალგაზრდა ქალი ქმედუუნარო გახადა, 2020 წლის 12 თებერვალს ბათუმში მოხდა. მეგობართან სტუმრად მყოფ მეგის მეორე სართულის აივანზე ფეხი მოუცურდა, გადავარდა და ხერხემალი დაუზიანდა.
„ჩვენ ქუთაისიდან ვართ. ჩემი შვილი მეგი, ორი თვის გათხოვილი იყო ბათუმში, როდესაც ეს ამბავი მოხდა. 12 თებერვალს მეგობარ გოგოსთან იყო სტუმრად. მოყინული იყო იმ დღეს, აივანზე ფეხი მოუსრიალდა, თავი ვერ შეიმაგრა და გადავარდა. შემთხვევა პუშკინის ქუჩაზე ე.წ. „ორბის ბინებში“ მოხდა. ჩაუტარდა პირველადი გადაუდებელი ოპერაცია. როგორც ექიმები ამბობენ, ზურგის ტვინი აქვს დაზიანებული, სპინალური შოკი აქვს მიღებულიო მითხრეს,“ – გვიყვება მეგის დედა ნათია ბაღდავაძე.
მეგი გონჩაროვას ოპერაცია ბათუმში ჩაუტარდა. თუმცა ოპერაციის მიუხედავად სიარული ვერ შეძლო. როგორც მეგის დედა ამბობს, სჭირდება განმეორებითი ოპერაცია, რომელიც რისკებს შეიცავს.
„ექიმებმა გადაჭრით ვერ მითხრეს, რომ ოპერაციის შემდეგ სიარულს შესძლებდა. გვინდოდა თურქეთში სამკურნალოდ წაყვანა, მაგრამ კორონავირუსმა მოგვისწრო და ვეღარ წავიყვანეთ. ეტაპობრივად სხეულის სხვადასხვა ნაწილში უბრუნდება მგრძნობელობა. ექიმებთან კონსულტაციის შემდეგ გადავწყვიტეთ თერაპიის ჩატარება მისთვის. თუმცა ეს ყველაფერი დაკავშირებულია ხარჯებთან, რომლის გაღების საშუალებაც არ გვაქვს,“ – ამბობს ნათია ბაღდავაძე.
ნათია სტილისტია, კორონავირუსამდე სალონში მუშაობდა, მისი მეუღლე თურქეთში იყო დასაქმებული. ახლა ორივე უმუშევარია. ოთხი შვილი ჰყავთ. ფული, რომელიც მეგის მკურნალობისთვისაა საჭირო, არ აქვთ. რამდენიმე დღის წინ მეგი ბათუმიდან ქუთაისში დედამ სარეაბილიტაციო კურსის გასავლელად წაიყვანა.
მეგის ჯერ შშმ პირის სტატუსი არ აქვს. ამის გამო სახელმწიფოსგან დახმარებას ვერ იღებს. არც სარეაბილიტაციო კურსი უფინანსდება. მეგის დედა ამბობს, რომ მეგის ჯერ არც ეტლი ეკუთვნის, მისი საყიდელი ფული კი ოჯახს არ აქვს.
„ერთადერთი ორგანიზაცია დაგვეხმარა, საქველმოქმედო ფონდი „იალქანი“, რომელმაც 720 ლარი ჩაურიცხა მასაჟისტს, ვინც მეგის რეაბილიტაციაში გვეხმარება.
ერთადერთ რამეს ვითხოვ, თუ ვინმეს აქვს საშუალება ფინანსური დახმარების გაწევის, დაგვეხმაროს. რეაბილიტაციისათვის მეგი ქუთაისიდან წყალტუბოში უნდა ვატაროთ. ტრანსპორტირებას თანხა სჭირდება. ასევე რეაბილიტაციასაც, რისი საშუალებაც ჩვენ არ გვაქვს,“ – ამბობს ნათია ბაღდავაძე.
[checklist]
- მეგის დასახმარებლად დედას გახსნილი აქვს ანგარიში. მსურველებს შეუძლიათ თანხა ჩარიცხონ.
[/checklist]
ანგარიშის ნომერი თიბისი ბანკში: GE15TB7895536010100007
ანგარიშის ნომერი საქართველოს ბანკში: GE67BG0000000161533704
მიმღები: ნათია ბაღდავაძე
