ბოლო 24 საათის განმავლობაში აჭარიდან 382 პირს ჩაუტარდა ლაბორატორიული კვლევა. მათგანც არცერთს კორონავირუსი არ დაუდასტურდა. ინფორმაცია ამის შესახებ ჟურნალისტებს დღეს, 2 მაისს, აჭარის ჯანდაცვის მინისტრის მოადგილემ, ნინო ნიჟარაძემ მიაწოდა.
„ჯერჯერობით სიტუაცია გვაქვს სტაბილური და ვიმედოვნებთ ახალი შემთხვევები გვექნება მინიმალური და ერთეული შემთხვევები. თუმცა ეს არ ნიშნავს იმას რომ ჩვენ გვაქვს კარგი სიტუაცია, ვინაიდან ეპიდემიოლოგიური სიტუაციის შემდგომი განვითარების პროგნოზი დამოკიდებულია თითოეულ ჩვენგანზე,“ – განაცხადა ნინო ნიჟარაძემ.
მისივე ინფორმაციით, კორონავირუსის პანდემიის დაწყებიდან დღემდე აჭარაში სულ 4300 მეტი ლაბორატორიული კვლევა ჩატარდა და მათ შორის დაახლოებით 1000 იყო სამედიცინო პესონალის წარმომადგენელი
„მიმდინარეობს რისკის ჯგუფების ტესტირება და ეს პირველ რიგში გახლავთ სამედიცინო პერსონალი. აუცილებლად ჩავერთვებით თავშესაფრის მობინადრეებისა და პერსონალის ტესტირებაში. ასევე საკარანტინე სივრცეში დასაქმებული პერსონალის ტესტირებაში.
მომდევნო პერიოდში მიზნობრივი ჯგუფების მოცულობა გაიზრდება და შესაბამისად ტესტირების რაოდენობაც იქნება გაზრდილი,“ – განმარტა ნინო ნიჟარაძემ.
2 მაისის მდგომარეობით ბათუმში კლინიკა „მედალფაში“ კორონავირუსით ინფიცირებული 24 პაციენტი მკურნალობს.
2 მაისის დილის მონაცემებით ცხელების კლინიკებში ჯამურად არის 40 პირია მოთავსებული და დღის განმავლობაში მათი ლაბორატორიული კვლევის შედეგებს ელოდებიან.
აჭარაში სულ 31 ადამიანი განიკურნა ვირუსისგან.
