ქართველ მეზღვაურებს, რომლებიც თურქულ გემებზე მუშაობენ, საქართველოში ჩამოსასვლელად თურქეთის მხრიდან საგანგებო ნებართვა სჭირდებათ – ამის შესახებ დღეს, 14 აპრილს, „მაესტროს“ ეთერში ისაუბრა გიორგი ჯანჯღავამ, საქართველოს ელჩმა თურქეთში.
„ჩვენი მეზღვაურები ხშირად მუშაობენ თურქულ გემებზე და შეზღუდვების დაწყების პირველივე დღეებიდან აკრძალული იყო თურქული და უცხოური გემებიდან მეზღვაურების მიღება, ამიტომ ყოველ ინდივიდუალურ შემთხვევაში ჩვენ საზღვაო ადმინისტრაციასთან ერთად ვმუშაობთ, ვახდენთ საგარეო საქმეთა სამინისტროს ინფორმირებას და სხვა უწყებების, რომ დართონ ნება, 14 დღე იყონ მეზღვაურები კარანტინში და შემდეგ გამოემგზავრონ სამშობლოში“ – განაცხადა გიორგი ჯანჯღავამ.
მისივე თქმით, საქართველოს საელჩო თურქეთში რამდენიმე ათეული ასეთი შემთხვევის შესახებ არის ინფორმირებული:
„რამდენიმე დღის წინ ჩვენ სამი-ოთხი მეზღვაური გამოვამგზავრეთ სამსუნიდან, ახლა ველით 14-დღიანი კარანტინის გავლას და ნებართვებს შესაბამისი უწყებებიდან, რომ ისინი დაბრუნდნენ საქართველოში“.
ამ თემაზე:
თურქეთის 31 ქალაქში 2 დღით მოქალაქეებს ქუჩაში გასვლა ეკრძალებათ – მათ შორის, სტამბოლში
