კულტურული მემკვიდრეობა,მთავარი,სიახლეები

რას უპირებს სააგენტო ბათუმში, ბარათაშვილის ქუჩაზე დამწვარ სახლს

08.04.2020 • 5118
რას უპირებს სააგენტო ბათუმში, ბარათაშვილის ქუჩაზე დამწვარ სახლს

ბათუმში, ბარათაშვილის #25-ში, ხანძრისგან დაზიანებული სახლის აღდგენის მოთხოვნით მოქალაქეებმა აჭარის კულტურული მემკვიდრეობის დაცვის სააგენტოს მიმართეს. სახლი კულტურული მემკვიდრეობის ძეგლია, ამიტომაც შესაბამისი გადაწყვეტილება სწორედ ამ სააგენტომ უნდა მიიღოს.

ფოტო: შოთა გუჯაბიძე

კულტურული მემკვიდრეობის ძეგლის სახურავს ხანძარი 28 მარტს გაუჩნდა, დაიწვა სახურავი და მეორე სართულის ნაწილი, ხოლო ნაწილი წყლის ჭავლმა დააზიანა.

კმდს-ს ხელმძღვანელის, ზაურ ახვლედიანის ინფორმაციით, სააგენტო სახლის დამწვარი ნაწილის აღდგენა-რეაბილიტაციის პროექტს შეისყიდის:

„მანამდე მერიაში გადავაგზავნეთ მოთხოვნა, იქნებ გამოინახოს თანხა დროებით გადახურვისთვის, შემდეგ კი ჩვენ შევისყიდით რესტავრაციის პროექტს. მერიამ უნდა გააკეთოს რესტავრაცია ამ პროექტის მიხედვით. ჩვენ გარკვეული თანხის შემცირება მოგვიწია ბიუჯეტში ვირუსის გამო, ამიტომაც სრულად ვერ დავაფინანსებთ რესტავრაციას. ვფიქრობ, შევძლებთ გადახურვას და პროექტირებას მერიასთან ერთად.“

სააგენტოს ხელმძღვანელი ვარაუდობს, რომ მერიას რესტავრაციისთვის საჭირო თანხის გაღება სარეზერვო ბიუჯეტიდან მოუწევს.

ხანძრის შედეგად ბათუმში რვა ოჯახის საცხოვრებელი დაზიანდა. ისინი ამ დროისთვის ნათესავებთან ცხოვრობენ. მერიის ინფორმაციით, ოჯახები თავად მოძებნიან დროებით საცხოვრებელს, რომელთა დასაქირავებლად თანხას მერია გაიღებს.

გადაბეჭდვის წესი