მართლმადიდებელი ეკლესიის სინოდის წევრი, ჩრდილოეთ ამერიკის ეპისკოპოსი საბა ინწკირველი აცხადებს, რომ მას კორონავირუსი არ დაუდასტურდა, მაგრამ ინფიცირებულია ნიუ იორკში მყოფი სასულიერო პირი – სპირიდონ ნარსია.
„სამწუხარო ინფორმაცია მინდა გითხრათ იმ კუთხით, რომ მეორე სასულიერო პირი არის დაინფიცირებული. თქვენთვის ყველასათვის კარგად ცნობილი, ნიუ იორკში მამა სპირიდონ ნარსიას აღმოაჩნდა კორონავირუსი. იცით, რომ ნიუ იორკი არის ეპიცენტრი. არ ვიცით საიდან დაინფიცირდა, ვისთან ჰქონდა შეხება, თუმცაღა მინდა გითხრათ ასევე, რომ წინა შაბათ-კვირას მას მსახურება არ ჩაუტარებია და სახლის პირობებში გადის მკურნალობას“.
ეპისკოპოსმა მრევლს მოუწოდა, სახლებში ილოცონ: „მე ვაგრძელებ მსახურებას. მე ვილოცებ აქ ტაძრიდან და თქვენ ილოცეთ სახლში ჩვენთვის და ასე ერთობით, სიყვარულით, ურთიერთპატივისცემით, ამაღლებული პასუხისმგებლობით, გავუმკლავდებით ამ გამოწვევას. ღვთის შეწევნით გადაივლის ეს განსაცდელი, მაგრამ ჩვენ ეს განსაცდელი მოგვცემს მაგალითს, თუ როგორი დამოკიდებულება უნდა გვქონდეს ერთმანეთის მიმართ…
მადლობა უფალს ყველაფრისათვის, განსაცდელი მოვა, მაგრამ ჩვენ ნებისმიერ განსაცდელს გადავიტანთ, თუკი ჩვენ გვექნება პასუხისმგებლობა და სწორი მიდგომა ამა თუ იმ განსაცდელის დროს“.
ეპისკოპოსმა ასევე თქვა, რომ ტაძარში აქვთ საჭმელი და თუკი ვინმეს სჭირდება დახმარება, მიმართონ მას: „ძალიან რთული მდგომარეობაა ნიუ იორკში, ქართველობო, გთხოვთ, ნუ შეშინდებით. ესაა განსაცდელი, რომელიც არაერთ ქართულ ოჯახს შეეხო, ჩვენთან აქ ჩრდილოეთ ამერიკაში. გთხოვთ, შეძლებისდაგვარად, ერთმანეთის გვერდზე დავდგეთ. თუ ვინმეს დახმარება სჭირდება, გთხოვთ დამიკავშირდეთ და ჩვენ შეძლებისდაგვარად დაგეხმარებით. ჩვენ საკვები ნაწილი გვაქვს ტაძარში, რომელიც საელჩომ ჩამოიტანა და გთხოვთ, რომ გადასცეთ სხვებს, რომ თუ ვინმეს საკვები უჭირს, დაგვიკავშირდით“.
კორონავირუსი დადასტურებული აქვს ნიუ იორკში მყოფ კიდევ ერთ სასულიერო პირს – იოსებ მინდიაშვილს.
____
მთავარი ფოტო: ეპისკოპოსი საბა ინწკირველი
