Batumelebi | რიზეს პროვინციის ერთ ნაწილში კარანტინი გამოაცხადეს რიზეს პროვინციის ერთ ნაწილში კარანტინი გამოაცხადეს – Batumelebi

რიზეს პროვინციის ერთ ნაწილში კარანტინი გამოაცხადეს

თურქეთში, რიზეს პროვინციაში, ქალაქ ქენდირლისა და მის მიმდებარე ოთხ სოფელში – ბესთეპეში, ახალ სელიმიეში, ესენთეპსა და მალთეფეში კარანტინი გამოაცხადეს. კარანტინი გამოცხადებულია თურქეთის ჯანდაცვის სამინისტროს გადაწყვეტილებით, კორონავირუსის გავრცელების პრევენციისთვის.

რიზეს გუბერნატორის განცხადებით, კარანტინად გამოცხადებული ზონის ყველა შესასვლელ-გასასვლელი მკაცრად კონტროლდება. ამასთან, მოქალაქეებს საცხოვრებელი სახლებიდან გამოსვლა მხოლოდ გადაუდებელი აუცილებლობის შემთხვევაში შეუძლიათ.

ქალაქ ქენდირლიში დაახლოებით 3500 ადამიანი ცხოვრობს. გუშინ, 26 მარტს, ქალაქში კორონავირუსით 67 წლის კაცი გარდაიცვალა. სამი პირი კი საავადმყოფოში გადაიყვანეს საეჭვო სიმპტომებით. კაცი, რომელიც გარდაიცვალა სალოცავად მეჩეთში დადიოდა. მისი ვირუსით გარდაცვალების შესახებ ინფორმაციის გავრცელებას ქალაქში პანიკა მოჰყვა.

როგორც თურქული გამოცემა Birgun წერს, სწორედ ამის გამო მიიღო თურქეთის ხელისუფლებამ ქალაქის და მისი მიმდებარე სოფლების საკარანტინო ზონად გამოცხადების გადაწყვეტილება.

“მოქალაქე, რომელიც გარდაიცვალა ხშირად დადიოდა მეჩეთში და იქ ხალხთან ურთიერთობდა. ამ ამბავმა პანიკა გამოიწვია ქალაქში. ერთადერთი ვარიანტი გვქონდა, კარანტინი გამოვაცხადეთ და ყველა ჩვენი მოქალაქე შემოწმდება ვირუსზე. შესაბამისი ზომები უკვე მიღებულია.  მინდა ჩვენი მოქალაქეები დავამშვიდო და მოვუწოდო, გაითვალისწინონ ხელისუფლების რეკომენდაციები და დარჩნენ სახლში,” – თქვა ქენდირლის მერმა ალათინ სერდარმა. მერის კომენტარს Birgun.net ავრცელებს.

ნეტგაზეთის მასალების სხვა გამოცემებში გადაბეჭდვის წესი
ავტორი