„ზიარება ეკლესიის შესასვლელთან შედგება, ტაძარში ღვთისმსახურებას მხოლოდ 10-კაციანი შემადგენლობა აღავლენს: მღვდელი, სტიქაროსნები და მგალობლები“, – გვითხრა ბათუმის და ლაზეთის ეპარქიის პრესსპიკერმა, იოანე გორელიშვილმა.
საკვირაო ღვთისმსახურებას მრევლი ტაძრის გარე ტერიტორიიდან ხმის გამაძლიერებლით მოისმენს. ეპარქიის პრესსპიკერი ამბობს, რომ მრევლმა ორმეტრიანი დისტანცია უნდა დაიცვას ლოცვის მოსმენის დროს და ტაძრის შესასვლელთან ზიარების მიღებისას.
ბათუმის და ლაზეთის ეპარქიაში ეს გადაწყვეტილება მას შემდეგ მიიღეს, როცა ქვეყანაში დღეს, 21 მარტს საგანგებო მდგომარეობა გამოცხადდა. საგანგებო მდგომარეობით აიკრძალა ნებისმიერი 10-კაციანი თავშეყრა. გუშინ, 20 მარტს სინოდმა, სხვა რელიგიური ორგანიზაციებისგან განსხვავებით, უარი თქვა ზიარების წესის შეცვლასა და მღვდელმსახურების შეჩერებაზე, რომელიც კორონავირუსის გავრცელების საფრთხეს ქმნის.
ამ დრომდე უცნობია, რა ფორმით შედგება საკვირაო ღვთისმსახურება სხვა ტაძრებში. „ბათუმელები“ საპატრიარქოს გადაწყვეტილებას მიღებისთანავე გაგაცნობთ.
