Batumelebi | უდაბნოს კალიის შემოჭრა საქართველოში არ დაფიქსირდება – სეს უდაბნოს კალიის შემოჭრა საქართველოში არ დაფიქსირდება – სეს – Batumelebi
RU | GE  

უდაბნოს კალიის შემოჭრა საქართველოში არ დაფიქსირდება – სეს

„უდაბნოს კალია საქართველოს ტერიტორიაზე არასდროს დაფიქსირებულა და გაეროს სურსათისა და სოფლის მეურნეობის ორგანიზაციის 2020 წლის პროგნოზით, მავნებლის გეოგრაფიული არეალის გაზრდა და მისი შემოჭრა საქართველოში საფუძველს მოკლებულია,“ – აცხადებს სურსათის ეროვნული სააგენტო.

საქართველოს სურსათის ეროვნული სააგენტოს ინფორმაციით, გაეროს სურსათისა და სოფლის მეურნეობის ორგანიზაცია (FAO) ყოველწლიურად აქვეყნებს სხვადასხვა სახეობის, მათ შორის, უდაბნოს კალიის მიგრაციის რუკას, რომელიც გავრცელებულია აფრიკის კონტინენტზე, არაბეთის ნახევარკუნძულზე, ერაყისა და ირანის სამხრეთ ნაწილში:

წყარო: სეს

სურსათის ეროვნული სააგენტო აცხადებს ასევე, რომ ყოველწლიურად ახორციელებს იტალიური და მაროკოული კალიების საწინააღმდეგო ღონისძიებებს, რომლებიც ფიქსირდება აღმოსავლეთ საქართველოში – კახეთისა და ქვემო ქართლის რეგიონებში.

„სააგენტოს მიერ ჩატარებული ღონისძიებების შედეგად, იტალიური კალიის პოპულაცია კონტროლირებადია, რაც ხელს უწყობს მწვანე საფარის შენარჩუნებას და ეკონომიკური ზარალის თავიდან აცილებას. იტალიური კალიის გარდა საქართველოში გავრცელებულია კალიის სხვა ენდემური სახეობები, რომლებიც არ წარმოადგენენ საფრთხეს,“ – აცხადებს სააგენტო.

აღმოსავლეთ აფრიკასა და სამხრეთ აზიაში ბოლო 25 წლის განმავლობაში კალიების ყველაზე მასშტაბური შემოსევაა. ასობით მილიარდი კალია საფრთხეს უქმნის მოსავალსა და საცხოვრებელ გარემოს.

ამ თემაზე:

კალიების მასშტაბური შემოსევა: გაერო შიმშილის რისკზე საუბრობს

მთავარი ფოტო: ევროპის პრესსააგენტო. EPA/DAI KUROKAWA

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com