ნეტგაზეთი • RU

ქადაგება არ იქნება, ხანდაზმულები ლოცვაზე არ უნდა მივიდნენ – მეჩეთებში ლოცვის წესი იცვლება

სრულიად საქართველოს მუსლიმთა სამმართველოს გადაწყვეტილებით, მეჩეთებში ლოცვის წესი იცვლება. დროებით აღარ იქნება ტრადიციული ქადაგებები, მლოცველებს კი მიეცათ რეკომენდაცია, თავი შეიკავონ პარასკევისა და  სხვა ლოცვების ჯამაათით შესრულებისგან მეჩეთებში.

17 მარტს ბათუმში, სამუფთო სამმართველოში, მუნიციპალიტეტების მუფთები და თეოლოგები შეიკრიბნენ. სწორედ ამ სხდომაზე მიიღეს სასულიერო პირებმა გადაწყვეტილება და გამოსცეს რეკომენდაციები, რომელთა დაცვაც მკაცრად ევალებათ მლოცველებსა და იმამებს:

დაიცვან სამლოცველოებში ჰიგიენის წესები და პერიოდულად ჩატარდეს სადეზინფექციო სამუშაოები;

ლოცვის წინ და ლოცვის შემდეგ მხოლოდ სიტყვიერი მისალმებით შემოიფარგლონ, არ ჩამოართვან ხელი და არ გადაეხვიონ ერთმანეთს, ნუ გამოიყენებენ საერთო სარგებლობის კრიალოსანს და ლოცვის დასრულების შემდეგ არ ჩამოისვან ხელები სახეზე;

რეკომენდებულია იქონიონ საკუთარი სალოცავი ხალიჩა;

ხანდაზმულები, ქრონიკული დაავადების მქონე პირები და ისინი, ვისაც რესპირატორული დაავადებების სიმპტომები აღენიშნებათ, არავითარ შემთხვევაში არ მივიდნენ მეჩეთებში და სხვა ხალხმრავალ ადგილებში;

მაღალი საფრთხის მქონე ადგილებში არსებულ მეჩეთებში შესრულდეს მხოლოდ ლოცვის სავალდებულო ნაწილი (ფარძი და ხუტბა), ხოლო ნებაყოფლობითი ნაწილი (სუნნეთი ლოცვები) შესრულდეს სახლებში, დროებით შეჩერდეს ქადაგება, რომელიც პარასკევის ლოცვის დროის დადგომამდე სრულდება, რითაც შემცირდება მეჩეთებში მლოცველთა დიდი დროით გაჩერება;

ვირუსის გავრცელების მასშტაბებისა და რისკების გათვალისწინებით, განსაკუთრებით ცენტრალურ და ხალხმრავალ მეჩეთებში, გარკვეული პერიოდით, ვიდრე არ გაივლის ეპიდემიის გავრცელების საშიშროება, მლოცველს შეუძლია თავი შეიკავოს პარასკევისა და სხვა ლოცვების ჯამაათით შესრულებისგან მეჩეთებში. ამ შემთხვევაში, პარასკევის ლოცვის ნაცვლად პიროვნება ინდივიდუალურად შეასრულებს შუადღის ლოცვას საკუთარ სახლში.

სრულიად საქართველოს მუსლიმთა სამმართველოს განცხადებით, თუკი ქვეყანაში უფრო გართულდება ვითარება და ვირუსის გავრცელების პრევენციის მიზნით გამკაცრდება ჯანდაცვის უწყებების რეკომენდაციები, ისინი შესაბამისად იმოქმედებენ.

ნეტგაზეთის მასალების სხვა გამოცემებში გადაბეჭდვის წესი
ავტორი