Batumelebi | გახარიას თქმით, კერძო სექტორის დასახმარებლად მთავრობა მილიარდს მიმართავს გახარიას თქმით, კერძო სექტორის დასახმარებლად მთავრობა მილიარდს მიმართავს – Batumelebi
RU | GE  

გახარიას თქმით, კერძო სექტორის დასახმარებლად მთავრობა მილიარდს მიმართავს

პრემიერ-მინისტრმა გიორგი გახარიამ ახლახან [14:00] ბრიფინგი გამართა და თქვა, რომ მთავრობა კორონავირუსის პრევენციასთან დაკავშირებით დაწესებული შეზღუდვების გამო ბიზნესის ნეგატიური ზეგავლენისგან დასაცავად, კერძო სექტორის დასახმარებლად, მილიარდ ლარს მიმართავს.

პრემიერის განმარტებით, ეს თანხა სახელმწიფო ბიუჯეტიდან დაიხარჯება და ამაში არ იგულისხმება „ქართუ ფონდის“ შეთავაზება: „თუმცა საჭიროების შემთხვევაში ჩვენ მივმართავთ „ქართუ ფონდს“ და ყველას“.

მისივე ინფორმაციით, კომპანიებს გადაუვადდებათ როგორც ქონების, ასევე საშემოსავლო გადასახადი სამი თვით. შესაბამისად, კომპანიებისთვის ამ მიმართულების მიმდინარე დავალიანების მომსახურების ვადა პირველ ნოემბერს დადგება.

პრემიერის თქმით, ჯერ ადრეა იმაზე საუბარი, თუ რა ზიანი მიადგება ეკონომიკას. მან რელევანტური უწოდა ასევე კითხვას საგანგებო მდგომარეობის გამოცხადებაზე და თქვა, რომ მთავრობა არ აცხადებს საგანგებო მდგომარეობას, თუმცა მიმართავს გარკვეულ ნაბიჯებს, რასაც საგანგებო მდგომარეობასთან დაკავშირებული ღონისძიებები ითვალისწინებს: „ეს მოქალაქეებისთვის გარკვეული უფლებების შეზღუდვას გულისხმობს, ჩვენ გვაქვს დღეს შესაძლებლობა, გამოწვევებს ვუპასუხოთ შეზღუდვის გარეშე.“

ნეტგაზეთის მასალების სხვა გამოცემებში გადაბეჭდვის წესი
ავტორი