ბათუმის მერიის ცნობით, კორონავირუსის გავრცელების პრევენციის მიზნით, დღეიდან დროებით შეწყდა წარმოდგენები დელფინარიუმში და გაუქმდა მუნიციპალიტეტის ორგანიზებით დაგეგმილი ხალხმრავალი ღონისძიებები.
პრევენციის მიზნით, დღეს იწყება ბათუმის მუნიციპალურ საბავშვო ბაღებში სადეზინფექციო ღონისძიებები და მუნიციპალური ავტობუსების სპეციალური ხსნარებით დამუშავება, ასევე, ხსნარებით იწმინდება მუნიციპალიტეტის ადმინისტრაციული შენობები.
მერიის ცნობით, შეხვედრა გაიმართა მიკროავტობუსების კომპანიების წარმომადგენლებთანაც, რომელთაც სადეზინფექციო სამუშაოებთან დაკავშირებით შესაბამისი რეკომენდაციები მიეცათ.
ბოლო მონაცემებით, საქართველოში დღემდე სამ პირს დაუდასტურდა კორონავირუსი. ორი მათგანი ირანიდან დაბრუნდა, ხოლო ერთი – იტალიიდან. კორონავირუსის პრევენციის მიზნით, უმაღლესმა სასწავლებლებმა 16 მარტამდე სწავლება შეაჩერეს; საჯარო სკოლებში საგაზაფხულო არდადეგები ერთი კვირით გადმოიწია და 9 მარტის ნაცვლად 2 მარტს დაიწყო. სკოლებში არდადეგები გაგრძელდება 16 მარტამდე, ამ პერიოდში კი ყველა სკოლაში ჩატარდება სადეზინფექციო სამუშაოები.
16 მარტამდე სააღმზრდელო პროცესი შეწყდა საჯარო საბავშვო ბაღებშიც.
