Batumelebi | თოვლის გამო აჭარის რამდენიმე სოფელში სასწავლო პროცესი ჩაიშალა თოვლის გამო აჭარის რამდენიმე სოფელში სასწავლო პროცესი ჩაიშალა – Batumelebi
RU | GE  

თოვლის გამო აჭარის რამდენიმე სოფელში სასწავლო პროცესი ჩაიშალა

აჭარაში რამდენიმედღიანი ინტენსიური თოვის შემდეგ გამოიდარა, თუმცა თოვლის საფარის გამო ხულოს, ქედისა და შუახევის ზოგიერთ სოფელში შეფერხებულია გადაადგილება, რის გამოც მოსწავლეები ვერ გამოცხადდნენ მუნიციპალიტეტების რამდენიმე სოფლის სკოლასა და საბავშვო ბაღში. მეორე დღეა ინტენსიურად წმენდენ გზებს, შეფერხდა სასწავლო პროცესი.

ქედაში ამ დროისთვის მზიანი ამინდია, თუმცა ტემპერატურა -8 გრადუსია. თოვლის საფარი დაბაში 50 სმ-ია, მაღლობში კი – 1 მეტრი.

ქედაში გზის გასაწმენდად დღეს დილიდან 17 ერთეული ტექნიკა მუშაობს 11 მიმართულებით. ქედის კომუნალსერვისის 2 ერთეული ტექნიკა კი დაბის ქუჩებს წმენდს.

ქედაში, მოსწავლეთა გამოუცხადებლობის გამო, სასწავლო პროცესი არ შედგა 15 საბავშვო ბაღიდან 13-ში. სასწავლო პროცესი იმავე მიზეზით არ შედგა ასევე N2 საჯარო სკოლაში, დანდალოს N1 და წონიარისის სკოლებში.

შუახევში ღამით 14 გრადუსამდე ყინვა დაფიქსირდა. გზები მოყინულია. მაღალი ზონის სოფლებში ერთ მეტრომდე თოვლია. შუა ზონაში  – 50-60 სმ, ხოლო დაბაში  – 20 სანტიმეტრამდე.

თოვლის საფარისგან გაწმენდილია ადმინისტრაციულ ერთეულთან დამაკავშირებელი გზები და ნაწილობრივ – სოფლების გზები. დილიდან განახლდა გაწმენდის სამუშაოები. მუშაობს აჭარის საავტომობილო დეპარტამენტის 20-მდე ტექნიკა.

გზები იწმინდება: ხიჭაური – ნაღვარევის, ინწკირვეთის, ბრილის, ჭვანა – გომარდული – წყაროთის, ვანის, ფურტიოს, პაპოშვილები – გორის, წაბლანის, კვიახიძეების, შუბანი – დარჩიძეების, შუბანი – ვაკის, დღვანის, ქიძინიძეების, ნენიის, ჩანჩხალოს, ჯაბნიძეების მიმართულებით.

სასწავლო პროცესი მოსწავლეების გამოუცხადებლობის გამო არ შედგა შუახევის სამ საჯარო სკოლაში (ნაღვარევში, ცხემლისსა და ჟანივრში) და  ხუთ ბაგა-ბაღში (ხიჭაურში, უჩამბაში, ბუთურაულში, ჭალასა და წყაროთაში). შუახევის მერიის პრესცენტრის ინფორმაციით, სასწავლო პროცესის ჩასატარებლად სკოლებსა და ბაგა-ბაღებში შესაბამისი პირობები არის, მოსწავლეების გამოუცხადებლობის მიზეზი – მოყინული გზებია.

ხულოს სკოლებში სასწავლო პროცესი არ შეფერხებულა, თუმცა ბავშვები არ გამოცხადებულან დანისპარაულის, ვერნებისა და უჩხოს საბავშვო ბაღებში.

ადმინისტრაციული ერთეულების ცენტრებსა და კურორტ გოდერძისთან დამაკავშირებელი გზები გაწმენდილია. საავტომობილო მოძრაობა რეკომენდებულია მაღალი გამავლობის ავტომანქანებით.

ძლიერი ყინვის გამო ცენტრალურ გზებზე მიმდინარეობს მოყინვის საწინააღმდეგო პრევენციული ღონისძიებები. დღეს დილიდან დაიწყო სოფლის ცენტრებისა და შიდა საუბნო გზების გაწმენდა.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან