7 თებერვალს, დღის პირველ ნახევარში, ბათუმის ახალ მეჩეთში ადამიანის უფლებების სწავლებისა და მონიტორინგის ცენტრი (EMC) მუსლიმი თემის წევრებს შეხვდება. შეხვედრას დაესწრებიან: ორგანიზაციის ხელმძღვანელი თამთა მიქელაძე, შესაბამისი კვალიფიკაციის იურისტები და სოციალური მუშაკი. EMC მოქალაქეებს სთავაზობს უფასო იურიდიულ და სოციალურ კონსულტაციებს მათთვის პრობლემატურ საკითხებზე. მათ შორის, სოციალური დაცვის, რელიგიის თავისუფლების, გარემოს დაცვის, განათლების უფლების, დისკრიმინაციის საკითხებზე.
„ადგილზე იურიდიული და სოციალური კონსულტაციების გარდა, EMC-ი შეეცდება, რომ თემისგან მოსმენილი საჭიროებები და წუხილები ადგილობრივ მუნიციპალიტეტს და შესაბამის სახელმწიფო უწყებებს გაუზიაროს“, – წერია ორგანიზაციის მიერ გავრცელებულ ინფორმაციაში.
იმავე დღეს, 6 საათზე, სოლიდარობის პლატფორმასთან ერთად EMC-ი მართავს დისკუსიას თემაზე: “არადომინანტური ეთნიკური და რელიგიური ჯგუფები საქართველოში – გამოწვევები და სოლიდარობის შესაძლებლობები”. შეხვედრა გაიმართება ბათუმის დემოკრატიული ჩართულობის ცენტრში.
ახალგაზრდები ქვემო ქართლიდან, აჭარიდან, პანკისიდან და სამცხე-ჯავახეთიდან ისაუბრებენ რეგიონებში არსებულ გამოწვევებზე, არადომინანტური რელიგიური და ეთნიკური ჯგუფების სოციალურ-პოლიტიკურ გარიყულობაზე. საკუთარ ხედვებს რეგიონებში არსებულ ვითარებაზე აუდიტორიას გაუზიარებენ აქტივისტები – ქამრან მამედოვი, ჰურიე აბაშიძე, რამზან გორგიშვილი და ნორო გასპარიანი.
იგივე ჯგუფი 8 თებერვალს ხულოს მეჩეთში შეხვდება ადგილობრივ მუსლიმ თემს, სადაც ასევე იმსჯელებენ თემის წინაშე არსებულ გამოწვევებზე.
