4 თებერვალს აჭარაში მოსული უხვი ნალექის გამო ელექტროენერგიის მიწოდება შეუწყდა ხულოს სოფლების: რიყეთისა და დანისპარაულის 200 აბონენტს. „ენერგო პრო-ჯორჯიას“ ინფორმაციით, აღნიშნულ სოფლებს ელექტროენერგიის მიწოდება დღის ბოლომდე აღუდგებათ.
ამ დროისთვის აჭარის მაღალი ზონის სოფლებში თოვლის საფარი 60 სმ-ია, ხოლო დაბაში – 30 სანტიმეტრი. რაც შეეხება გოდერძის უღელტეხილს, აქ თოვლის საფარი 1 მეტრამდეა.
ხულოს მერიის ცნობით, ამ დროისთვის საავტომობილო მოძრაობა აღდგენილია მუნიციპალიტეტის ადმინისტრაციული ერთეულების ცენტრამდე და მიმდინარეობს შიდა სასოფლო გზებზე თოვლის საფარის გაწმენდის სამუშაოები.
გზების გაწმენდის სამუშაოებს აჭარის საავტომობილო გზების დეპარტამენტის 19 ერთეული ტექნიკა და ხულოს მუნიციპალიტეტის მერიის მუნიციპალური სერვისების 2 ერთეული ტექნიკა აწარმოებს.
კურორტ გოდერძიზე გადაადგილება შესაძლებელია მაღალი გამავლობის ტრანსპორტით.
უხვი ნალექის მოსვლასთან დაკავშირებით, დღეს, 5 თებერვალს, საგანგებო სიტუაციების მართვის შტაბის სხდომა გაიმართა ხულოს მერიაში.
მერიის ცნობით, საგანგებო სიტუაციების მართვის შტაბი 24 საათი მუშაობს და მოქმედებს ცხელი ხაზიც: 551 00 52 72.