2020 წლის 19 თებერვალს ქობულეთის მუნიციპალიტეტის ადმინისტრაციულ შენობაში შპს „გრინ რეზორტის“ სკოპინგის ანგარიშის საჯარო განხილვა გაიმართება. საჯარო განხილვის ორგანიზატორი საქართველოს გარემოს დაცვისა და სოფლის მეურნეობის სამინისტროა. აჭარის მთავრობის ინფორმაციით კი, „აჭარაში ნახევარი მილიარდი ლარის საინვესტიციო პროექტზე“ „გრინ რეზორტმა“ მშენებლობის ნებართვა უკვე მიიღო.
„ნახევარი მილიარდი ლარის საინვესტიციო პროექტის ფარგლებში კომპანია პირველი ვილის სამშენებლო სამუშაოების დაწყებას უახლოეს პერიოდში გეგმავს. აღნიშნული ვილა შოურუმისა და კომპანიის ადგილობრივი ოფისის ფუნქციებს შეასრულებს. იგეგმება კომპლექსის შიდა გზის და კომუნიკაციების სამუშაოების დაწყებაც. ქობულეთის მუნიციპალიტეტის საკრებულომ მწვანე ქალაქის მულტიფუნქციური კომპლექსის განაშენიანების რეგულირების გეგმის პროექტი უკვე დაამტკიცა. განაშენიანების გეგმის თანახმად კომპლექსის ტერიტორიის 70%-ს რეკრეაციული ზონა დაიკავებს“, – აღნიშნული იყო აჭარის მთავრობის მიერ გავრცელებულ ინფორმაციაში.
ქობულეთში ნახევარი მილიარდი ლარის ინვესტიციის განხორციელება მთავრობამ ხელშეკრულების გაფორმებიდან მალევე დაანონსა, თუმცა, ოფიციალურად გაფორმებული ნასყიდობის ხელშეკრულებით, ინვესტორს არანაკლებ 250 მილიონი ლარის ინვესტიციის ჩადების ვალდებულება აქვს.
ქობულეთში 180 ჰექტარი ტერიტორია აჭარის მთავრობამ კერძო კომპანია „გრინ რეზორტს“ 2019 წლის მარტში 6 040 265 ლარად მიჰყიდა. ამ ტერიტორიაზე კომპანიის პროექტი მრავალფუნქციური სასტუმროს, საკურორტო-გამაჯანსაღებელი და საცხოვრებელი კომპლექსის მშენებლობას ითვალისწინებს.
„მწვანე ქალაქი“ / რენდერი
კომპანიში მიიჩნევენ, რომ მათთვის გადაცემული ტერიტორია „სახეშეცვლილი, დეგრადირებული გარემოა, რომელსაც ამჟამად არანაირი მნიშვნელოვანი ეკოლოგიური თუ ეკონომიკური ფუნქცია არ გააჩნია“. თუმცა ეს ტერიტორია ესაზღვრება ქობულეთის სახელმწიფო ნაკრძალსა და აღკვეთილს, ნაწილობრივ კი, ფიჭვნარის ანტიკური ნაქალაქარის ტერიტორიასაც მოიცავს.
რა ზემოქმედებას მოახდენს ეს პროექტი ფიჭვნარის ნაქალაქარზე, ქობულეთის დაცულ ტერიტორიებზე და რას გეგმავს კომპანია? – პირველ რიგში, პროექტის განსახორციელებლად, კანონით, საჭიროა გარემოზე ზემოქმედების შეფასების ანგარიშის [გზშ] მომზადება. გზშ-ს მომზადებამდე კი, კომპანიამ სკოპინგის განაცხადით მიმართა საქართველოს გარემოს დაცვისა და სოფლის მეურნეობის სამინისტროს.
სწორედ ამ ანგარიშის განხილვაა დაგეგმილი ქობულეთის მუნიციპალიტეტის შენობაში 19 თებერვალს, 15:00 საათზე.
სამინისტროს ინფორმაციით: „საჯარო განხილვა ღიაა, მასში მონაწილეობის, ასევე შენიშვნებისა და მოსაზრებების წარდგენის უფლება აქვს საზოგადოების ნებისმიერ წარმომადგენელს. პროექტის დოკუმენტაციასთან დაკავშირებული შენიშვნები და მოსაზრებები ასევე შეგიძლიათ წარუდგინოთ სამინისტროს 2020 წლის 20 თებერვლამდე… ასევე, მოთხოვნის შემთხვევაში, სამინისტრო უზრუნველყოფს „გარემოსდაცვითი შეფასების კოდექსით“ გათვალისწინებული დოკუმენტაციის მიწოდებას ნაბეჭდი სახით“.
ამ თემაზე:
https://batumelebi.netgazeti.ge/news/226283/
