განათლების საერთაშორისო ცენტრი 2020-2021 წლების ექვს სასტიპენდიო პროგრამაზე მიღებას აცხადებს. ცენტრის ინფორმაციით, პროგრამები ითვალისწინებს როგორც სწავლის საფასურის, ასევე ცხოვრებისთვის საჭირო ხარჯების ანაზღაურებას.
ექვსივე პროგრამაზე ელექტრონული განაცხადების მიღება დაიწყო დღეს, 3 თებერვალს. დოკუმენტაციის ატვირთვა კონკურსში მონაწილე პირებს შეუძლიათ ცენტრის ვებგვერდზე შემდეგ პროგრამებზე:
- საერთაშორისო სამაგისტრო პროგრამები
- საერთაშორისო სადოქტორო პროგრამები
- საერთაშორისო სახელოვნებო აკადემიური პროგრამები
- საზღვარგარეთ კვალიფიკაციის ამაღლების პროგრამა
- სამაგისტრო პროგრამები საფრანგეთში
- აკადემიური პროგრამები იტალიაში
„აქედან ოთხი პროგრამა არის სახელმწიფოს მიერ დაფინანსებული. ორი პროგრამა ხორციელდება საფრანგეთისა და იტალიის საელჩოების ხელშეწყობით, რომელიც სამაგისტრო და სადოქტორო პროგრამებს ითვალისწინებს. ფინანსდება ყველა მიმართულება, როგორც ჰუმანიტარული, სოციალური და ტექნიკური, ასევე სახელოვნებო“, – გვითხრეს განათლების საერთაშორისო ცენტრში.
როგორც ცენტრში ამბობენ, ერთობლივ პროგრამებზე განცხადებებს ერთი თვის განმავლობაში მიიღებენ, სახელმწიფოს მიერ დაფინანსებულ პროგრამებზე კი – ორი თვის განმავლობაში.
„დოკუმენტაციის ატვირთვა მიმდინარეობს ჩვენი ორგანიზაციის ვებგვერდზე ელექტრონულად. პირველი ეტაპის დასრულების შემდეგ, დაიწყება განაცხადების განხილვა და მეორე ეტაპზე გადავლენ საუკეთესოები“, – გვეუბნებიან ცენტრში.
ორგანიზაციის განცხადებით, საუკეთესოების კატეგორიაში მოხვდებიან ის კონკურსანტები, ვისაც აქვთ მაღალი აკადემიური მოსწრება, კარგი სამოტივაციო წერილი, გამოცდილება. გარდა ამისა, მნიშვნელოვანია სად მიდის სასწავლებლად კონკურსანტი.
კონკურსში მონაწილემ უნდა წარმოადგინოს ჩარიცხვის დამადასტურებელი დოკუმენტი იმ უმაღლესი სასწავლებლიდან, სადაც აპირებს სწავლას.
ცენტრის ინფორმაციით, ყოველწლიურად დაახლოებით 200 სტუდენტი ფინანსდება საქართველოდან.
