Batumelebi | ენმ ხულო-ზარზმის გზის მშენებლობასთან დაკავშირებული დოკუმენტების გასაჯაროებას ითხოვს ენმ ხულო-ზარზმის გზის მშენებლობასთან დაკავშირებული დოკუმენტების გასაჯაროებას ითხოვს – Batumelebi
RU | GE  

ენმ ხულო-ზარზმის გზის მშენებლობასთან დაკავშირებული დოკუმენტების გასაჯაროებას ითხოვს

„ჩვენ კატეგორიულად მოვითხოვთ დროულად მოხდეს ყველა იმ დოკუმენტაციის გასაჯაროება, რომელიც ხულო-ზარზმის გზის მშენებლობას უკავშირდება“, – განაცხადა „ერთიანი ნაციონალური მოძრაობის წევრმა“, რეზო ხარაზმა, დღეს, 10 იანვარს, ბათუმში გამართულ ბრიფინგზე.

ენმ-მ საქართველოს რეგიონული განვითარებისა და ინფრასტრუქტურის სამინისტროსგან, წერილობით გამოითხოვა ხულო-ზარზმის გზის პროექტის ფარგლებში შესრულებული სამუშაოების მიღება-ჩაბარების აქტები, სამუშაოებზე ზედამხედველი კომისიის სხდომის ოქმების, ასევე კომპანიასთან მიმოწერის [კორესპონდენციების] ასლები. პარტიაში აცხადებენ, რომ მათ ეს დოკუმენტები ვერ მიიღეს.

სამინისტროს გამგებლობაში მყოფი საქართველოს საავტომობილო გზების დეპარტამენტისგან ენმ-სთვის გაგზავნილ პასუხში აღნიშნულია, რომ, კომპანიასთან გაფორმებული ხელშეკრულების ზოგადი პირობების თანახმად „… არცერთმა მხარემ არ უნდა გაამჟღავნოს დეტალები იმ სამუშაოსი, რომელიც მომზადდა მეორე მხარის მიერ, მეორე მხარის წინასწარი თანხმობის გარეშე“.

„კონფიდენციალურობის პრინციპის გათვალისწინებით, დეპარტამენტი მოკლებულია შესაძლებლობას მოგაწოდოთ თქვენს მიერ მოთხოვნიული დოკუმენტაცია“, – აღნიშნულია დეპარტამენტის პასუხში, რომელსაც ხელს საავტომობილო გზების დეპარტამენტის თავმჯდომარე, ირაკლი ქარსელაძე აწერს.

ხულო-ზარზმის გზის მშენებლობასთან დაკავშირებით, „კონტრაქტორი [კომპანია „ტოდინი“] ცდილობს, დაიწყოს პირველი ეტაპის – მიწის სამუშაოები, თუმცა სუსტია მისი მზაობა, სამუშაოების განხორციელების კუთხით“, – მოგვწერეს „ბათუმელებს“ 2019 წლის 3 დეკემბერს, საქართველოს საავტომობილო გზების დეპარტამენტიდან.

შიდასახელმწიფოებრივი მნიშვნელობის ბათუმი [ანგისა] – ახალციხის საავტომობილო გზის ხულო-ზარზმის მონაკვეთის რეაბილიტაცია-რეკონსტრუქციის სამუშაოების ორივე ლოტზე ტენდერში გამარჯვებულია TODINI Costruzioni Generali S.p.A [„ტოდინი“].

ხულო-ზარზმის ახალი გზის მშენებლობას არაბეთის ეკონომიკური განვითარების ქუვეითის ფონდი [KFAED] აფინანსებს. პროექტის მთლიანი ღირებულება, 110 მილიონზე მეტი ლარია. სამუშაოები ორ ლოტად არის დაყოფილი. პირველი ლოტი – დაბა ხულოდან გოდერძის უღელტეხილამდე [69 946 268 ლარი] და მეორე ლოტი – გოდერძის უღელტეხილი-ადიგენის სოფელ ზარზმამდე [40 264 509 ლარი].

„ტოდინს“, რომელმაც ხულო-ზარზმის ახალი გზა უნდა ააშენოს, „ასეული მილიონის ოდენობით თანხას“ ედავება საქართველოს საავტომობილო გზების დეპარტამენტი. დავა ეხება კომპანია „ტოდინთან“ იმ ხელშეკრულების შეწყვეტას, რომელიც სამტრედია-გრიგოლეთის გზის მშენებლობაზე იყო გაფორმებული.

ამ და სხვა დავის წარმოებისთვის საერთაშორისო იურიდიული კომპანიის დასაქირავებლად კი დეპარტამენტს თითქმის 5 მილიონი ლარი სჭირდება.

ამ თემაზე:

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com